Usa ka 10-anyos nga batang babaye nga missing sud sa tulo ka adlaw na, napalgang patay sa basurahan sa Barangay Tapul, dakbayan sa Talisay human nigimaw ang tiil niini kagahapon sa buntag, Enero 9.
Ang biktima giila sa kapulisan nga si Kiara Mae Namanama, 10, molupyo sa Sityo Avocado, Barangay Maghaway, dakbayan sa Talisay.
Sumala sa inahan, ang bata niuban sa iyang inahan nga nanglaba sa sapa sa Sityo Napo sa Tapul ug nananghid nga mouban sa iyang maguwang nga lalake nga maligo sa ibabaw nga bahin sa sapa niadtong Huwebes, Enero 6.
Mao kini ang asoy sa inahan sa bata nga si Cerila Namanama, 47, ug molupyo sa Sityo Avocado sa Barangay Maghaway, Talisay sa Superbalita Cebu.
Matod niya, nagsugod sila og panglaba alas 6:00 sa buntag niadtong Enero 6.
Sa pagka alas 7:00 sa buntag, nananghid ang iyang kamanghuran nga anak nga mokuyog sa maguwang kay mangaligo sa sapa.
Apan niabot na ang alas 10:00 sa buntag sa susamang adlaw, dihang nangita na ang inahan kang Kiara Mae kay manguli na sa ilang panimalay aron maniudto apan wala na kini makita.
“Niapas gyud ko didto sa akong usa ka anak, Sir, kadtong iyang maguwang kay akong kuhaon kay ingon lagi sa ubang bata niuna og uli akong anak mao to nga nabalaka nako. Unya pagkakita nako sa maguwang ug akong gipangutana, niingon pud nga niuli na nagdala paman gani daw to og lubi. Didto nako gikulbaan,” matod sa inahan sa Superbaita Cebu.
Tulo na ka adlaw nga ilang gipangita ang iyang anak, hangtod niabot na sa punto nga mga estorya basin og nikuyog sa engkanto ug niingon nga gikaon sa bitin.
Ug sa p agka buntag sa Dominggo, Enero 9, usa ka lalake nga kauban sa ilang pagtuo sa simbahan, nikuyog aron motabang sa pagpangita sa iyang anak ug duna kini kahibalo sa rescue operations ug nakabantay sa mga lagong.
Ang mga lagong nga nag-alirong sa usa ka langob sa suok nga bahin sa luyo sa basurahan sa Tapul.
Sa ilang pagsusi, nigimaw ang tiil sa bata ug nanimaho na ang bata.
Rason nga nangayo na sila og pakitabang sa kapulisan ug uban pa.
Sa pagtabang sa kapulisan, mga sakop sa Bureau of Fire Protection (BFP) ug mga sakop sa City Disaster Risk Reduction and Management Office (CDRRMO) sa dakbayan sa Talisay, naugkat ang biktima nga gibutang sa usa ka gamay nga langub ug gitabunan og mga bato sa pagtuo nga dili mahibaloan tungod sa kahilit sa dapit.
Si Police Lieutenant Colonel Randy Caballes, hepe sa Talisay City Police Station, niingon sa ilang pakisayod sa lugar nga dunay upat ang ilang makonsiderar karon nga persons of interest, kinsa maoy nakit-an sa saksi nga niagi sa dapit dihang niagi usab ang maong bata sa nasoy nga adlaw.
Apan wala una mobutyag ang hepe sa mga ngan sa upat ka mga lalake samtang naghimo pa sila og dugang pakisusi sa kaso.
Dugang ni Caballes, dili pa una kini makasulti kon gipanamastamasan ang maong bata sanglit nagpaabot pa sila sa resulta sa awtopsiya gikan sa batid nga doktor.
“Dili pa ta makaingon niana ha kon gihilabtan ba. Apan naay dakong posibilidad nga gihilabtan kini subay sa sitwasyon sa bata,” matod ni Caballes.
Gihulagway ni Caballes nga ang biktima dihang nakaplagan sa awtoridad anaa ang iyang pang-ibabaw nga sinina apan ang short pants sa bata nawalis na kini.