ANGAYAN ba kitang' taga dakbayan sa Cebu, Mandaue, Talisay, Danao, ug Naga, ug ang kalungsoran sa Probinsya nga magmaya nga naa lang gihapon ta sa Alert Level 1 samtang ang dakbayansa Lapu-Lapu giisa na sa Alert Level 3? Dili. Kinahanglan nga magmatngon ta ug atong kanunayon ang pagtuman sa mga health protocols, sama sa husto nga pagsul-ob sa face mask, paglikay sa mga tapuk-pundok, ug magpakabakuna na samtang naa pay libre nga gihatag sa kagamhanan.
Niadtong Enero 6, 2022, basi sa rekomendasyon sa sub-technical working group, giisa sa IATF sa Alert Level 3 ang dakbayan sa Lapu-Lapu sugod niadtong Enero 9 hangtud sa Enero 15, 2022. Lakip samo ang orden mao ang mosunod nga mga dapit: Iloilo City, Region 6; Naga City, Region 5; Batangas ug Lucena City, Region 4-A; Angeles City, Bataan, Olongapo City, Pampanga ug Zambales, Region 3; Santiago City ug Cagayan, Region 2; Dagupan City, Region 1; ug Baguio City, Cordillera Administrative Region.
Ang Alert Level 3 nagdili sa face-to-face nga klase sa mga eskuylahan, conserto, ug contact sports, sama sa basketball ug uban pa nga kalihokan nga magtapok og daghan tawo. Limitado sad sa 70 porsento ang mga sakyanan nga pasaheroan.
Angayan na usab nga ipatuman sa LTFRB dinhi sa atong rehiyon ang 70 porsento nga kapasidad sa mga pasaheroan nga sakyanan. Makadaghan ko makasunod og mga PUJ nga sobra na sa 100 porsento ang pasahero kay ang uban nagkabyon na sa likod sa PUJ. Naa say mga gahi'g ulo nga di mosul-ob og tarong sa face mask samtang naa sulod sa mga mall ug supermarket nga maghuwat pa nga badlongon sa gwardiya ug uban tawo.
Niadtong Domingo, nakasunod ko'g inahan kuyog ang iyang dalagita nga anak sa usa ka supermarket, nga wala gipasulod sa gwardiya tungod kay wala pa mabakunahi ang iyang anak. Wa ko makatuo sa akong nasaksihan nga wa pa mabakunahi ang dalagita nga unta naa nay daghan bakuna nga libre sa kagamhanan ug iya pa gyud gikuyog nga mogawas sa ilang panimalay nga gidili man unta ang palakaw-lakaw sa mga tawo nga wala pa makabakunahi batok sa Covid-19.
Bisan tuod og dili kayo delikado ang Omicron variant sa Covid-19 apan, matud sa mga eksperto, mas dali ug paspas ni nga motakod sa katawhan. Gani, sa Metro Manila, kusog ang pamalit sa paracetamol tungod kay mao ni una panguntra sa sip-on ug labad sa ulo, hinungdan sa pagkahurot sa supply niini. Hinaut nga di ni moabot sa Cebu, nga mahutdan og paracetamol ang mga parmasyotika.
Sa bag-o nga taho sa Department of Health (DOH), dunay 22,000 ka tawo na nganatakboyan sa Covid-19 Omicron variant didto sa kaulohan. Dinhi sa atong dakbayan sa Cebu ug Mandaue, nakalingkawas ta kay gi-strikto ang pagdili sa mga kalihokan sosyal sama sa party ug uban pa. Unya, morag nakatabang si Bagyo Odette sa iyang pag-agi tungod kay nawad-an ta og suga ug tubig mao nga walay mga party nga gipasiugdahan niadtong pagsugat sa Pasko ug Bag-o nga Tuig.