SIKOP ang idlas nga gipanganlan og "Kikik" atol sa gihimong buy-bust operation sa hiniusang puwersa sa kapulisan sa Police Regional Office (PRO)-Davao Region niadtong Huwebes, Enero 6, 2022.

Giila ang dinakpan nga si Kris (bansagon gitago) alyas "Kikik," 39, residente sa Sto. Niño, Mintal, Tugbok, Davao City.

Sumala sa kapulisan nga gikonsidera nga ikaupat sa drug watchlist sa Davao Region ang suspek.

Nasayran nga unang nakigtransaksiyon ang suspek sa Regional Intelligence Division, Station Drug Enforcement Team sa Talomo Davao City Police Office ug Regional Special Operations Group nga mobaligya og shabu sa Mati City, hinungdan nga nakig-alayon sab ang kapulisan sa Davao ngadto sa Mati City police.

Dangtan og pipila ka oras, gibalhin sa suspek ang lugar diin asa siya magbaligya ug naabot sila sa Matina sa Davao City.

Malampuson ang gihimong buy-bust operation, diin narekober gikan sa posisyon sa dinakpan ang gituohang shabu nga mokantidad og P240,000.

Gikasohan na ang suspek didto sa korte.