Nagplano ang Philippine Olympic Committee (POC) nga pahugtan ang usa sa ilang mga probisyon sa Olympic charter aron maseguro nga makarepresentar gihapon si pole vault Olympian EJ Obiena sa nasod sa international competitions, asoy ni POC President Rep. Abraham “Bambol” Tolentino.
Ang national Olympic committee (NOC) ningpahugot sa ilang pagsuporta kang Obiena kalabot sa bikil niini sa Philippine Athletics Track and Field Association (PATAFA).
Ang PATAFA ningpadayag sa ilang intensyon nga taktakon si Obiena sa national team ug pasakaan kini og kasong estafa sa pasangil nga miwaldas kini paggamit sa pundo nga gitagana alang sa iyang training.
Hinuon, parehong ning-uyon si Obiena ug ang PATAFA nga motambong sa usa ka panaghugpong nga giorganisar sa Philippine Sports Commission (PSC) sa tinguhang masulbad ang kakulian sa duha ka mga kampo.
Nagkanayon si Tolentino nga kon wala’y positibong resulta sa panaghugpong ug ipadayon sa PATAFA ang ilang planong taktakon si Obiena sa national team, ilang gamiton ang ilang gahom aron protektahan ang world no. 6 pole vaulter.
“The POC will invoke the provision on the IOC charter,” matod ni Tolentino sa interbyu sa programa ni kanhi Philippine Basketball Association (PBA) Commissioner Noli Eala nga “Power and Play.”
Nalatid sa Rule 27 sa Olympic nga ang NOCs mao ang adunay katungod sa representasyon sa tagsatagsa ka nasod niini sa Olympic Games, regional, continental o world multi-sports competitions nga adunay pagtugot sa IOC.
Ang NOCs mao sab ang adunay katungod sa pagpadala og mga atleta ug coaches sa Olympic Games.
“Remember, kami ang nagpapadala ng list of delegates. Yes, it is being proposed by NSAs, pero kami ‘yung last say, kami ‘yung nagpapadala,” pasabot ni Tolentino.
Si Obiena maoy defending Southeast Asian Games champion ug kasamtangang naggunit sa pole vault record sa Asia nga 5.93 meters nga iyang narehistro sa International Golden Roof Challenge sa Innsbruck, Austria niadtong Septiyembre, 2021.
Gilaumang mosalmot si Obiena sa 31st SEA Games sa Hanoi, Vietnam karong Mayo, 2022 ug maoy labing inilog sa Asian Games sa Hangzhou, China karong Septiyembre, 2022.