Kadaghanan kanato niadtong nagsingabot pa ang Pasko sa 2021 ug misugat sa Bag-ong Tuig sa 2022 pulos nangandam aron saulogon kini kay lagi mihinay man ang nagpositibo sa Covid 19 niadtong higayona. Daw sa angay siya nga saulogon kuyog ang pamilya kay sa milabayng tuig wa man ta katarong sa pagselebrar niini.
Apan, kawang lang ang pangandam nato kay niadtong Disyembre 16 sa gabii miigo ang Bagyong Odette nga gikusokuso ta pag-ayo sa nagmangtas nga hangin nga mosobra sa lima ka oras kining nagsaoysaoy. Ang resulta, daghang mga balay ang way atop, way gipili maadunahan man o kabus, nangabali ang mga kahoy, nangadaut ang kaumahan, nangatumba ang poste sa kuryente ug nagbilin ni og binilyon nga danyos nga may atong gasa sa Pasko.
Way kabutangan ang akong kahadlok bisan nasinati nako sa kamangtas sa mga Bagyong Nitang ug Ruping kay ang akong gipuy-an karon uban sa akong pamilya haduol sa dagat ug sapa. Inig sud padung sa akong balay anaa ang kabaybayunan sa Dumlog, dakbayan sa Talisay nga niadtong higayona nahitabo ang storm surge diin giguba niini ang seawall samtang ang kilid nga bahin mao ang Mananga River nga misaka ang tubig niadtong higayona kutob sa hawak sa tawo kay giguba niya ang paril sa among subdivision.
Matag tuig, makasinati tag mosobra sa 10 ka mga bagyo diin nagkakusog na base sa akong nasinati sa Nitang ug Ruping kay mga usa ka oras nihinay naman ang hangin apan sa kang Odette mosobra sa lima ka oras ang hangin nga naghaguros ug nanaghoy nga niresulta nga daghang naapektuhan nga mga nanag-una nato nga panginahanglan sama sa suga, tubig, internet connection, gasolina, ATM, ug uban pa.
Ang mga nakaandam og generator set nakasilbi gilayon sa katawhan apan kadtong wa hangtod ning panahona padayon pa gihapon silang sirado bisan kon ang ilang negusyo gikinahanglan kaayo. Akong gihagit ang mga local government units (LGU) nga mopasar silag balaod nga ang tanang mga establisemento nga adunay negusyo ilabi na namaligya sa unang panginahanglan sa tawo aduna silay generator set aron makasilbi gilayon sa pagka sunod adlaw.
Gilinyahan ang mga gasolinahan nga adunay generator set og mosobra sa lima ka oras apan kon ang tanang mga gasoline station may generator set pa, di ingon ato kataas ang linya sa mga motorista. Gilauman nato nga kini mahatagan og prayoridad sa mga konseho sa matag LGU kay matag tuig ta nga magsinati sa bagyo.