Managsuon gidakop tungod kay usa kanila giingong nagduwa sa kinatawo atubangan sa usa ka batan-ong babaye ug usa niini giingong nangumot og lubot sa laing babaye sa JV Resort,Brgy. Inayagan, dakbayan sa Naga sa Dominggo, Enero 9, alas 3:33 sa hapon.
Si Vanessa (dili tinuod ngan), 17, dalaga, taga South Covina sa Barangay Dumlog, dakbayan Talisay, nireklamo batok kang Joseph Roldan Montenegro Trazona, 42, minyo, taga Brgy. Inoburan, dakbayan sa Naga tungod sa giingong pagduwa sa kinatawo samtang nag-atubang kaniya.
Samtang, iyang maguwang nga si Danilo Trazona, 46, ulitawo, lumolupyo sa samang dapit nalandig sa tambalanan human gitabangan og kulata human nangumot sa lubot sa laing 16 anyos nga babaye (ngan gipungan) diha sa swimming pool sa resort.
Si Major Joseph Lopena, hepe sa Naga Police Station nga nahinabi sa Superbalita Cebu, nagkanayon nga ang mga biktima nangaligo sa swimming pool uban sa ilang kabanay ug higala.
Samtang, ang managsuong suspek nangaligo sab uban sa ilang mga higala ug nag-inom og ilimnong makahubog.
Dugang ni Lopena, ang lamisa sa mga biktima ug mga suspek nagtupad duol sa swimming pool.
Ang 17 anyos mibutyag nga nakugang siya kay diha sa iyang atubangan nagduwaduwa sa iyang kinatawo si Joseph.
Dili lang siya ang nakakita sa gihimo sa lalake lakip iyang kabanay ug higala.
Samtang, ang 16 anyos nireklamo abtok kang Danilo human nanghikap sa iyang lawas ug gikumot iyang lubot.
Ang 16 anyos nga naglangoylangoy sa swimming pool ug gikalitan sa pagkumot ang lubot hinungdan nga nahitabo ang komusyon, sinumbagay tali sa kampo sa suspek ug sa biktima.
Gumikan sa komusyon, gialarmahan sa kapulisan ug napusasan ang managsuon.
Si Joseph mag-atubang sa kasong kalapasan sa RA 11313 o ‘Bawal Bastos Law ingon man Disobedience human misukol sa mga pulis.
Si Danilo mag-atubang sa kasong kalapasan sa RA7610 o Anti Child Abuse Law.
Sumala ni Major Lopena, hubog ang mga suspek uban sa mga higala ug nagpabugnaw sa swimming pool samtang nagtagay.
Dihang nahubog na, dason sa hepe, wala makakontrolar sa kaugalingon nga nagbinastos.
“Hubag (sexy) kaayo ning mga batan-ong (babaye). Wala makaagwanta ning magsuon kay nakainom, nag----, unya ang usa naibog sa naglangoylangoy nga hubag sab gikumot ang lubot,” dugang ni Lopena.
Si Lopena nibutyag nga daghang nakakita sa managsuong suspek sa ilang pagbinastos.
Pero ang duha nanghimakak sa pasangil.
Kagahapon, Enero 10, ang kaso batok sa duha ka mga suspek gipasaka sa piskaliya sa dakbayan sa Naga.
Samtang ang 17 anyos nga ig-agaw sa mga biktima gitanggong kay ang suspek nga si Danilo niakusar nga maoy nangulata kaniya hinungdan sa iyang pagkalandig sa tambalanan.