ANAA na sa 20,606 ang kinatibuk-ang mga kaso sa coronavirus disease (Covid-19) sa Cagayan de Oro, human nakatala ang syudad og 56 ka mga kaso sulod sa duha ka adlaw.
Sumala sa report sa City Health Office, sa 56 ka mga bag-ong lokal nga mga kaso, usa ang mga locally stranded individuals (LSIs), lima ang mga returning overseas Filipinos (ROFs) ug 50 ang mga local transmissions.
Matud ni medical officer Dr. Ted Yu, sa 50 ka mga bag-ong lokal nga kaso, 26 ang mga local index nga kaso, 11 ang mga close contacts sa mga pasyenteng nagpositibo sa coronavirus, unom ang mga authorized persons outside residence (Apors), upat ang mga Apors with link, ug tulo ang mga persons deprived of liberty (PDLs).
Ang ihap sa mga aktibo nga kaso sa Cagayan de Oro mitaas usab, aduna na karon sa 160.
Sa maong numero, 40 niini na-admit sa Northern Mindanao Medical Center ug uban pang mga ospital sa syudad, 109 ang mga outpatients, ug 11 ang mga ROFs/LSIs.
Nakatala usab og lima ka mga Covid-positive nga mga kaso nga karon naka-recover. Anaa na karon sa 19,594 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 852.