Mahimong makaduwa ang naturalized players sa Philippine Basketball Association (PBA) apan isip imports, pagtino ni league chairman Ricky Vargas.
Nagkanayon si Vargas nga ning panahuna, kuli ang poruhan nga matugtan ang naturalized players nga makaduwa sa liga isip local players.
“Sa ngayon, the door is closed pa on that, that they become a local player in the pro league,” matod ni Vargas sa interbyu sa “Power and Play” online program ni kanhi PBA commissioner Noli Eala.
“We have not looked at it favorably at the moment,” pasabot ni Vargas.
Natuki kining maong isyu human ningpadayag ang naturalized players nga kanhi nagduwa sa Gilas Pilipinas nga sila si Andray Blatche ug Marcus Douthit sa ilang intensyon nga makaduwa sa PBA isip local players.
Si Blatche, 35, nakaduwa sa Gilas Pilipinas sa duha ka mga edisyon sa FIBA Basketball World Cup apan wala pa kini nakapakita og aksyon sa PBA, labing unang professional nga liga sa Asya.
Si Douthit, 41, sulod na sab sa ubay-ubay nga mga higayon nga nakaduwa sa Gilas Pilipinas lakip na niini sa FIBA Asia Asia Championship, FIBA Asia Cup, ug Southeast Asian Games.
Nakaduwa na sab si Douthit sa PBA kaniadto isip import sa Air21 Express niadtong 2012 ug Blackwater Elite niadtong 2015.
Giangkon ni Vargas nga angay lang hatagan og oportunidad nga makaduwa sa PBA ang naturalized players nga nakarepresentar na sa nasod.
“Our naturalized players who served the country should at least be given a chance to play with us. As imports, pwede, ‘di ba?,” batbat ni Vargas.
Gipasabot ni Vargas nga kinahanglan pa nilang tun-an ang pag-usab sa lagda aron makaduwa ang naturalized players nga nakarepresentar sa nasod isip local players sa PBA.
“This is again, the changing landscape of basketball. If they can play in the national team, why can’t they play in the PBA?” pasabot ni Vargas.