Dunay usa ka gobernador nga hilabihan ka ilado. Ilado nga palaaway. Bisan kinsa na lang ang giaway, ang gi-BS (bull....), ang kasab-an bisan naa sa publiko ug ang gusto diktahan.

Ilado pod ni siya nga kurakot. Hilabihan kadaghan ang mga kaso nga giatubang. Katilaw na gani ni og gisuspenso og 90 ka adlaw. Abtik lang ni siya mogamit og kwarta kay aron tapin-an ang mga kaso aron matulog lang ug di maglihok sama sa patay.

Ilado pod nga reklamador. Samtang naglihok ang uban aron dali makabangon human sa pagdagmal ni Odette, pulos reklamo lang ang gihimo niya. Wa kuno katabang o kulang ang tabang nga gihatag sa national government.

Manghulga pa nga kon di gani motabang dayon, lagmit magkagubot ang mga tawo ug mangawat na lang aron makakaon.

Ilado pod nga bakakon. Daghan na lang makatawa nga magtan-aw niya kay morag buotan og nawong pero hilabihan diay ka bakakon, bisan ang Obispo morekamo nas iyang kabakakon ug kakurakot.

* * *

Wa ra unta toy problema kon magtagawtaw siya kay kon maminaw ka niya, mora gyod siya og matinud-anon.

Ang kaanghit kay dali ra makakompara ang mga tawo sa mga gihimo sa ubang gobernador nga susama pod niya og sitwasyon. Mao kini hinungdan nga dali ra kaayo makapakanaog og hukom ang mga tawo nga wa gyoy hinungdan ang maong opisyal og angay na gyod ilisan.

Ang kaanghit kay dali ra kaayo maka-check ang mga tawo kon nagsulti ba gyod siya sa tinuod labi na sa iyang mga procurements, sa iyang mga pangutang nga wala ug tuo.

Ang kaanghit pod kay ‘SOP’ gyod na niya nga sa tanang ayuda nga madawat sa mga tawo. Duna gyod nay pictorial nga naa siya. Way pagpanghatag nga mahitabo kon wala siya. Unya gawas pa na sa mga hulagway sa iyang nawong nga ipapilit gyod sa tanang butang, certificate ug uban pa, kulang na lang nga hasta resibo sa gobiyerno butangan sa iyang nawong.

* * *

Matod pa sa usa ka gobernador, dunay 18 ka teams ang nagdagan sa iyang probinsiya nga gikan sa private contractors, mitabang aron mapadali ang ‘clearing operations’ human sa panamastamas ni Odette.

Nahimo kini human sa meeting nga iyang gipatawag diin diha sab ang private contractors. Dali ra kaayo misugot ang contractors sanglit mao na kini higayon nga makatabang sila sa mga nabiktima sa bagyo.

Dili kini mahimo sa laing gobernador. Magkinahanglan pa nga motawag siya sa DPWH (Department of Public Works and Highways) aron maoy motawag sa contractors.

Ngano man?

Tungod kay kon dunay mga proyekto sa maong probinsiya, dili niya gamiton anglocal contractors. Ang kasagaran niyang gamiton kadtong paborito niya nga contractors nga dili gikan sa maong probinsiya.