Barrita: 2 ka adlaw nga Bar exams
Duha ka tuig na nga naoktaba ang Bar examinations tungod sa Covid-19 pandemic. Way Bar exams sa 2020 ug 2021. Karong buwana dungan nga ipahigayon ang 2020 ug 2021 Bar exams.
Niadtong Enero 4, miluwat og kamandoan ang Korte Suprema sa pagpahigayon sa duha na lang ka adlaw nga Bar exams imbis sa tradisyonal nga upat ka managsunod nga Dominggo.
Ang mando sa Labawng Hukmanan gitawag nga “ pro hac vice” kon for this occasion only. Ang bag-ong schedule sa Bar exams gitakda karong Enero 23, Dominggo, ug Enero 25, Martes imbis sa upat ka Dominggo sa Enero 16, 23, 30 ug Pebrero 6.
Gimenusan usab ang gidaghanon sa mga Bar subjects gikan sa walo ngadto sa upat na lang tungod sa nagpadayon nga Covid-19 pandemic ug sa kadaot nga nahiaguman sa ubang mga dapit sama dinhi sa Sugbo gumikan sa bagyong Odette. Kini ubos sa rekomendasyon ni Associate Justice Marvic Leonen, ang Bar chairman.
Matod sa Korte Suprema mas taas ang review sa Bar examinees sa 2020 ug 2021 kay sa ubang mga batches pero “under very difficult conditions.”
Ang upat ka set sa 2020 ug 2021 Bar exams mao kining mosunod: 1.) The Law Pertaining to the State and its Relationship with Its Citizens (Political Law, Labor Law ug Taxation Law); 2.) Criminal Law; 3.) The Law Pertaining to Private Personal and Commercial Relations (Civil Law ug Commercial Law); ug 4.) Procedure and Professional Ethics (f Remedial Law, Legal Ethics ug Practical Exercises).
Ang tanang mga examinees giawhag nga mag-self quarantine sugod niadtong Enero 9, Dominggo o labing menos duha ka semana sa di pa ang examinations.
Gikinahanglan nga mokuha sila og antigen test 48 ka oras sa di pa ang exams. Kadtong positibo pakuhaon og confirmatory RT-PCR test. Kadtong positibo gihapon di pasudlon sa ilang testing sites. Sa laktod di makakuha sa Bar exams.
Matod sa Korte Suprema gihimo ang mga kausaban aron matubag ang panginahanglan sa bag-ong mga abogado. Sanglit way Bar exams sa miaging duha ka tuig, duha usab ka tuig nga way mga bag-ong abogado. (edbarrita@gmail.com)