Morag mihinayhinay nang mibalik sa normal ang situasyon sa pagkakaron. Dili na kaayo gubot ug wala nay tanto inilugay ang kahimtang. Pero nagpabilin gihapon abnormal og kalbaryo ang kahimtang sa uban. Walay tubig og wala gihapoy elektrisidad sa pipila ka mga lugar.
Dili lalim nga magpabilin kang magpuyo nga ingon niini. Dili ingon nga nag-asyoso kita apan mao na man god ang naandan nato. Tipik og kabahin na kini sa atong pagpakabuhi.
Sa labing uwahing updates sa tigum sa kagamhahan sa lalawigan sa Sugbo ubos ni Gov. Gwen Garcia mao nga ang gonernador gusto na nga kasaligan nga supply sa elektrisidad sa tibuok lalawigan. Mohatag siya og P5,000 cash assistance sa matag lineman nga motrabaho.
Ang Veco sa Liloan ug Cebeco sa Carcar City mitaho nga daghang nang napasiga nila og balik.
Ang telecommunications mihataho usab nga nahibalik na ang ilang mga linya sa pipila ka mga lugar sa probensiya. Ang PLDT ug Smart mitaho nga nahibalik na ang ilang mga linya sa ubang dapit sa probinsiya.
Mao usab ang Globe apan dili pa gyud ang tanan kay aduna pay pipila ka mga lugar nga wala pa mahibalik ang signal. Aduna pa gyuy pipila ka mga lugar nga dili pa gyud makontak.
Sa mga petroleum products, dili na kaayo problema sama niadtong unang mga adlaw human sa bagyo nga nagpila og linya ang mga tawo.
Wala nay taas kaayo nga linya. Wala nay inilugay ang makita sa mga gasoline stations. Maayo kay nahatagan na og solosyon ang maong problema. Ang nahitabo god sa unang mga adlaw human sa bagyo, adunay hoarding o pagpanago sa petroleum products mao nga nagnihit ang supply.
Apan bisan pa man nga hinay-hinay nang mibalik sa normal ang kahimtang, ania gihapon ang kahisagmuyo og kagul-anan nga nasinati sa uban. Ngano man? Gumikan kay wala may ang uban og tabang ug ayuda gikan sa kagamhanan.
Seguro ang uban labi pa kadtong doul sa luwag, nagdobledoble nag dawat apan aduna daghan nga gyuy wala makadawat ug ayuda. Mao nang dili nato sila mabasol nga magbaton og kasuko og kalagot sa mga mamunoan. (bobbygnalzaro@gmail.com)