48 nadakpan sa wa pagtuman sa health protocol sa Cebu City

Kapulisan sa siyudad sa Sugbo misugod na sa ilang Oplan Bulabog ug pagpatuman sa curfew diin 48 ang ilang nadakpan nga nakalapas sa lagda sa kagamhanan sa dakbayan sama sa health protocol.

Nabalaka ang kapulisan sa siyudad sa Sugbo nga mosulbong pa og maayo ang mga kaso sa coronavirus disease 2019 (Covid-19) kon padayon nga dili magpakabana ang katawhan sa minimum health standard.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga nakadawat silag kamandoan gikan sa Kagamhanan sa dakbayan sa Sugbo nga hingusgan na usab ang Oplan Bulabog.

Dunay impormasyon nga nasagap ang kapulisan sa dakbayan nga naay mga establisamento sama sa mga imnanan nga wala na motuman sa gipatuman nga health protocol.

HUGTAN

Daghan na, matod pa, ang manulod nga dili na pangayoan og vaccination card nga hugot nga gidili sa lagda nga giluwatan ni Mayor Michael Rama.

“Karon daghan na sad tag nadawat nga report that ang mga establishments especially ang mga resto bars wala na sad mag observe sa atoang protocols. So, karon ato na ning i-strictly implement especially kadtong directives sa mayor nga only those vaccinated ang pwede nga mosulod sa mga establishment,” matod ni Parilla.

Tungod sa maong impormasyon, gipasabot ni Parilla nga motutuk karon ang mga pulis sa mga establisemento kon misunod ba sila sa kamandoan lakip na ang curfew.

Sa nanglabay nga mga buwan, sa dihang nisaka pag-ayo ang mga kaso sa Covid, gihingusgan sa kapulisan ang curfew ug pag limit sa lihok sa mga tawo diin ang resulta mi ubos pag-ayo ang Covid. Gani adunay adlaw nga nag zero ang mga kaso sa dakbayan.

Lunes sa gabii, Enero 10, 2022, gikalitan sa pag inspection sa kapulisan ang 123 ka establisemento, diin 48 ka mga tawo ang nadakpan, 34 niini mga hamtong na, 29 ang nakalapas sa curfew ug 19 ang walay facemask.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph