Mga barangay kapitan sa Lapu-Lapu wa mokooperar ni Chan sa distribution

Pipila ka mga barangay kapitan sa dakbayan sa Lapu-Lapu wa mokooperar sa paghipos ug pag-verify sa mga ngalan sa mga kabus nga biktima sa bagyo nga makadawat sa P5,000 nga financial assistance gikan sa dakbayan.

Si Mayor Junard “Ahong” Chan niingon sa Lunes, Enero 10, nga nagpadala na siya og suwat ngadto sa maong mga opisyal sa barangay nga naghangyo kanila sa pagpasabot sa pormal nga pagsulat sa rason sa ilang pagdumili sa pagtabang sa Kagamhanan sa Dakbayan.

“Pagkahibawo nato nga wa nila trabahoa, nagpada kita og suwat nila, nagtugot nga gi-waive nila ang ilang right to do the verification,” matod sa mayor.

Gitubag ni Liga ng Mga Barangay president ug Bankal Barangay Captain Eduardo Cuizon ang alegasyon ug niingon nga nahuman na sa barangay officials ang ilang survey ug verification niadtong Disyembre 23, 2021.

Wala gibutyag ni Chan ang mga ngalan sa mga barangay nga wala mokooperar, apan sumala ni Cuizon, adunay 18 ka mga barangay kapitan nga sakop sa opposition bloc.

Dugang pa ni Cuizon nga ang mga datos nga nahipos sa mga barangay gisumiter ngadto sa City Social Welfare and Development Office (CSWDO) ug nahimong basehanan sa Konseho sa Dakbayan sa pag-aprobar sa P302 milyones nga budget alang sa cash aid.

Dugang pa sa barangay kapitan nga naglikay lang sila sa singgit sa mga tawo tungod kay nakatigom na sila sa gikinahanglang mga impormasyon pipila ka adlaw human mi-landfall ang Bagyong Odette (Rai) sa Sugbo niadtong Disyembre 16, 2021.

“Ang mga tawo mo ingon nganong sige man mo og survey, Kap?Asa naman ang ayuda?,” matod ni Cuizon.

Gipasanginlan usab ni Cuizon nga gipulitika sa mga kawani sa Barangay Mayor’s Office (BMO) ang proseso sa listing ug verification.

“Walay usa ka balay nga dili nila ingnon nga kang Mayor Ahong ta ha, kay si Mayor gyud ang naningkamot ani,” matod ni Cuizon.

Niadtong Enero 11, ang Siyudad nipagawas na og partial list nga gilangkuban sa 9,987 ka mga indibidwal nga angay makadawat sa cash aid.

Matod ni Chan, kini nga gidaghanon gikan lamang sa mga barangay sa Isla sa Olango.

“Mangayo ako og despensa nga wala pa nato makompleto ang mga barangay sa mainland tungod kay adunay ubang barangay nga wala pa makasubmit sa ilang listahan,” matod ni Chan.

Gitinguha ni Chan nga sugdan ang pag-apod-apod sa tabang pinansyal sa Enero 16 o 15, 2022.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph