Usa ka person of interest ang gitumbok karon sa Talisay City Police Station kalabot sa pag patay sa 10 anyos nga batang babaye nga napalgan sa Sityo Napo, Barangay Tapul, dakbayan sa Talisay niadtong Dominggo, Enero 9, 2022.

Matod ni Police Lieutenant Colonel Randy, hepe sa Talisay City Police Station, nga usa pa sa pagkakaron ang ilang natumbok nga person of interest, apan sila nagtuo nga duna kini mga kauban sa paghimo sa krimen.

“Sa atong witness, nakit-an ni atong person of interest didto sa lugar kon asa nakit-an si Kiara kadtong biktima,” matod ni Caballes.

Si Kiara Mae Namanama napalgan sa usa ka gamay ug mabaw nga langob tungod sa mga lagong sa dapit.

Dugang ni Caballes nga nitumaw ang pangan sa person of interest human sa pipila ka mga pagpangutana ug pagsuta ug dugang mga saksi nga ana-a sa palibot niadtong wala pa mahanaw ang bata.

Una nang gibutyag ni Caballes nga upat ang gidudahan nga mga killer base sa ilang unang nakuha nga kasayuran apan sa nag padayon nga imbestigasyon, usa pa ang gitumbok nga person of interest.

Wala una nganli ni Caballes kon kinsa kining maong tawo ingon man kon asa nagpuyo aron masiguro sa kapulisan nga dili makabantay nga siya person of interest.

REWARD

Ang kagamhanan sa dakbayan sa Talisay dunay gitanyag nga P100, 000 nga reward alang sa tawo nga makahatag og impormasyon aron mailhan ang killer o killers.

Alang kang Caballes nga ang tanyag ni Talisay City Mayor Gerald Anthony “Samsam” Gullas dakong tabang sa pagsulbad sa krimen pinaagi sa mga impormasyon.

Di sayonsayon ang pagdawat sa impormasyon kay kinahanglan nga susihon nila daan kon unsa ka lehitimo.

Samtang ang Talisay City Police Station nagpaabot usab sa resulta sa autopsy sa Regional Crime Labotatory Office aron mahibaw-an kon nahilabtan ba si Kiara Mae sumala sa pagduda sa kapulisan.

Si Kiara Mae na-missing sukad niadtong Huwebes, Enero 6, dihang nibiya sa iyang maguwang nga lalakeng 12 anyos samtang sila didto sa usa ka lim-aw nga mingaw sa ilang dapit.

Ang ila na lang nakaplagan mao ang tipik sa unod sa butong nga gikaon niini sa iyang paglakaw.