DAVAO DE ORO -- Nagkahiusa ang gatusan ka mga barangay opisyal gikan sa nagkalain-laing barangay ug mialma ug misulong sa munisipyo sa lungsod sa Monkayo alas 8:30 sa buntag, Martes, Enero 12, 2022.
Matud pa nga mikabat sa 116 ka mga opisyales ang mipasibaw sa ilang pagkadismaya ngadto sa opisina ni Mariolito Camangyan, ang municipal treasurer.
Gibutyag nga mialma ang mga opisyal sa barangay gumikan sa dili patas nga pagpang-apud-apod sa tag-P3 mil nga cash assistance gikan sa opisina ni Presidente Rodrigo Duterte.
Kini human masayri nga ang 116 ka mga barangay opisyales didto midapig sa kaatbang sa kasamtangang mayor karon sa lungsod nga si Mayor Ramil Gentugaya.
Sumala pa nga gitagana ngadto sa tanang mga kapitanes, kagawad ug secretary ang maong kantidad isip cash assistance.
Giingon nga sa 251 ka mga opisyales sa 21 ka barangay sa lungsod, 135 lang ang nakadawat sa cash assistance ug pulos mga kaalyado sa kasamtangang mayor.
Way nahatag nga insaktong tubag si Camangyan kung nganong wa gipahibalo kabahin sa tag-P3 mil ang 116 ka mga barangay opisyal.
Hinuon, gisulti ni Camangyan nga ang pagpang-apud-apod niini didto gipahitabo sa balay ni Mayor Gentugaya ug ang nahibilin nga kantidad nga alang unta ngadto sa mga nahisgutang opisyales giuli na ngadto sa opisina sa Presidente human matud pa way mikuha niini.
"Wala man mi gipahibalo nga naay gipanghatag, sila-sila ra man," puno sa pagkadismaya nga pahayag ni Kapitan Melagros Yugo sa Brgy. Olaycon kinsa naila nga dumadapig ngadto sa Partido sa kaatbang sa kasamtangang mayor.
"Pang-christmas unta to, pang December, dako nato'g tabang para namo. Unta tanan ang gihatagan kay sa nasyonal man to," dason ni Joselito Avena, kagawad sa Barangay Upper Ulip.
Samtang gibutyag ni Rene Guadalquiver, executive assistance sa lokal nga panggamhanan sa Monkayo nga dihang gihinabi ning tigsuwat pinaagi sa selpon nga puwede pa nga i-claim ang maong cash assistance apan didto na sa opisina ni Senador Bong Go sa Manila sanglit giuli na nila kini.
Butang nga nakapasamot pagkadismaya sa usa ka kapitan sanglit ang maong kantidad kulang pa nga igasto kung mao lang ang tuyuan pag-adto sa Manila.
Sa paghinabi sa radyo, sila si Montevista Mayor Eutropio "Topoy" Jayectin ug New Bataan Mayor Geraldford Balbin nagkanayon nga gihimo nila ang pagpang-apud-apod sa cash assistance ngadto sa tanang barangay opisyal sa ilang lungsod.
Way pili, kaalyado man o dili sanglit ang maong kuwarta iya sa nasyonal ug dili sa lokal nga panggamhanan nga gitagana sa tanang mga barangay opisyal.
Matud pa nga way nauling kuwarta sa lungsod sa Montevista ug New Bataan sanglit ang matag barangay nakadawat sa maong salapi.
Desidido ang 116 ka mga opisyal sa barangay nga mosang-at og pormal nga reklamo batok sa LGU-Monkayo sa tinguha nga mahatagan og hustisya ang wa paghatag og bili sa ilang pagpanerbisyo isip mga opisyal sa tagsa-tagsa nila ka mga barangay sa lungsod.