ANG mga indibiduwal nga nagpositibo sa Covid-19 pinaagi sa anti-gen test dili na magkinahanglan og kumpirmasyon pinaagi sa RT-PCR test.
Kini ang gisulti ni Dr. Mary Jean Loreche, chief pathologist sa Department of Health sa Central Visayas (DOH 7) atol sa iyang briefing sa Visayas Vaccination Operations Center sa Miyerkules, Enero 12, 2022.
“Pag ikaw ay positibo sa anti-gen test, there is no need to do confirmation using RT-PCR, because you are now considered a confirmed Covid-19 case,” siya niingon.
Samtang, si Loreche niingon nga ila nang gibalhin ang testing sa Covid-19 gikan sa contact tracing ngadto sa clinical management.
Kini nagpasabot nga ilang unahon ang testing sa subgroup classifications gikan sa A1 ngadto sa A3, nga naglangkob sa mga medical frontliner, senior citizens, ug mga tawo nga adunay commorbidities.
Dugang pa ni Loreche nga ang mga asymptomatic nga indibidwal dili usab prayoridad.
Gawas sa mga tawo nga adunay sintomas, ang mga wala pa makadawat sa ilang bakuna sa Covid-19, hatagan og prayoridad.
“In terms of hierarchy, sino ang priorities natin for testing? Yung mga walang bakuna. Susunod yung hindi fully vaccinated. Last po sa priority ang fully vaccinated,” matod niya.
Hinuon, giklaro sa chief pathologist nga sa higayon nga ang usa ka tawo mahisakop sa A1 ngadto sa A3, bisan unsa pa ang iyang status sa pagbakuna, siya ang unahon sa pagsulay.
HOME ISOLATION
Sa pagsaka sa mga kaso sa Covid-19 karong panahona, giklaro ni Loreche nga gitugotan na nila ang pag-isolate sa balay aron mopahiangay sa mga kausaban sa panahon.
“We did not allow home isolation the past two years primarily because our temporary treatment and monitoring facilities (TTMF) are enough,” siya niingon.
Kadtong gitugotan nga mag home isolate, matod ni Loreche, mao ang mga positibo sa Covid-19 nga mga tawo nga wala, mild ug moderate ang mga simtomas.
Aron maklaro, si Loreche miingon nga ang home quarantine para sa mga close contact sa suspek, probable, o kumpirmado nga kaso sa Covid.
Siya niingon nga lakip sa mga minimum nga rekisitos nga gitugot alang niini mao ang dedicated nga lawak, kasilyas alang sa pasyente, pagdumala sa health care provider o lokal nga gobyerno.
Gitataw ni Loreche atol sa briefing nga posibleng walay modagsa sa swabbing centers ug walay kakuwang sa resources taliwala sa hulga sa Omicron nga variant sa Covid-19.
WA PAY OMICRON
Subling niingon si Loreche nga wala pay Omicron variant nga nakita sa Central Visayas partikular na sa Sugbo.
Siya niingon nga ang DOH 7 nagpadala na og 81 ka mga sample sa Philippine Genome Center (PGC) sa katapusan sa Disyembre 2021, ug nagpaabot pa sila sa mga resulta nga ipagawas.
Giawhag sa pangu nga pathologist ang mga tawo nga likayan ang pagtago sa suplay sa tambal, labi na sa mga sintomas nga sama sa trangkaso.
“Wag po nating ubusin lahat kasi po nangagailangan po lahat tayo. There has to be an equitable distribution of resources,” tataw niya.