ANG Institute of Integrated Electrical Engineers (IIEE) of the Philippines Mactan Chapter motanyag og libreng inspeksyon ug serbisyo sa assessment sa mga panimalay sulod sa Mactan Electric Company (MECO) franchise area.
Si IIEE Mactan President Joseph Garry Dagpin nipadala og suwat ngadto kang Meco General Manager Gilbert Pagobo aron sa pagpahibawo sa electric company mahitungod sa tuyo sa organisasyon sa pagtabang sa re-energization efforts sa Mactan Island nga naglangkob sa Lapu-Lapu City ug lungsod sa Cordova.
Si Dagpin niingon sa SunStar Cebu, Miyerkules, Enero 12, 2022, nga kini magsilbi nga usa sa ilang Corporate Social Responsibility program.
Matod ni Dagpin nga aduna nay 12 ka mga lisensyado nga electrical engineers ang naka-commit ug nagtigom pa sila og pundok sa mga lisensyadong electrician aron moapil kanila.
Tungod kay kini nga mga enhenyero ug mga elektrisyan adunay mga trabaho sa mga adlaw sa semana, kadaghanan sa mga serbisyo mahimong mapahimudsan sa mga konsumedor sa Meco sa katapusan sa semana, ingon ni Dagpin.
Gipasalig ni Dagpin sa publiko nga way bayad ang ilang mga serbisyo gawas lang sa mga wiring ug electrical materials nga kinahanglang personal nga paliton sa mga konsumidor.
Bentaha sab kon ang usa ka propesyonal mosusi sa kahimtang sa wiring sa balay aron masiguro nga luwas na kini kon mabalik na gyud ang kuryente, matod ni Dagpin.