Misaka pagbalik ang mga kaso sa Covid-19 sa mga siyudad sa Sugbo, Lapu-Lapu ug Mandaue ug sa lalawigan sa Sugbo. Gitumbok nga hayan maoy hinungdan niini mao ang pakuso-kuso sa bagyong Odette. Abi nako kon ang coronavirus gipadpad ug gidala pahilayo sa makusog nga hangin ni Odette. Nitibugsok na man unta ang mga kaso sa Covid-19 sa wa pa moigo si Odette.

Unsaon nga nawagtang man sab ang social distancing sa mga tawo nga naglinya sa pagkawos og tubig, patubil og gasolina ug krudo ug bisan sa libre nga charging sa mga cellphones ug mga gadgets. Ang dyutay nga nahabilin sa kagaw dali kaayong nanaghan sa nagtampunsisok nga mga tawo.

* * *

Ginuntan pa gyud kini sa hulga sa grabe ka mananakod nga Omicron variant sa Covid-19. Ang Department of Health (DOH) 7 niingon ning atong pagsuwat nga wa pay konpirmadong kaso sa Omicron variant dinhi sa Sugbo.

Mobalik ba ta sa lockdown kon masuta nga nia na sa Sugbo ang Omicron variant? Si Dr. Mary Jean Loreche, chief pathologist sa DOH 7, niingon nga di sila morekomendar og lockdown kon dunay konpirmadong kaso sa Omicron variant ug bisan pa kon mao kini ang hinungdan sa pagsaka sa mga kaso sa Covid-19.

Ang ilang irekomendar mao ang border control. Di na masayon-sayon ang pagsulod sa Sugbo. Kinahanglan nga ang mobiyahe paingon sa Sugbo magpakita og negatibong resulta sa Covid-19 test.

* * *

Hangtod karon gi-estoryahan pa ang kadaot nga dala ni Odette, lakip na sa posibleng hinungdan sa pagsaka sa mga kaso sa Covid-19. Ang mga kahoy sa daplin sa highway padung sa habagatan ug amihanang bahin sa lalawigan sa Sugbo nangaupaw ang dahon morag kamunggay nga gipangharos.

Dinhi sa siyudad sa Sugbo, daghan ang nangreklamo sa kadugay sa pagbalik sa kuryente nga napawong sa dayong hapak ni Odette niadtong Disyembre 16, 2021. Lakip na niini ang akong gipuy-an sa interior nga bahin sa tunga-tunga sa D. Jakosalem St. ug Sikatuna St.

Maklaro nimo nga wa pa gyud makasiga ang kadaghanan sa syudad sa Sugbo kon tua ka sa bukid. Mao kini ang akong nakita sa may Barangay Busay sa among pagpauli gikan sa Lungsod sa Balamban sa miaging gabii. Pat-ak pat-ak pa ang mga dapit nga may kahayag sa syudad.