Cagayan de Oro nakatala og 77 bag-ong kaso sa Covid-19

ANAA sa 77 ang mga bag-ong kaso sa Covid-19 ug usa patay ang natala sa Dakbayan sa Cagayan de Oro Miyerkules, Enero 12, 2022.

Matud sa City Health Office, sa 77 ka bag-ong kaso, 43 ang local index nga mga kaso, 18 ang mga local cases with link, 10 ang mga authorized persons outside residence (Apors) ug unom ang mga Apors with link.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 20,712.

Adunay 261 aktibo nga kaso ang dakbayan, 58 niini na-admit sa Northern Mindanao Medical Center ug uban pang mga ospital sa syudad, 191 ang mga outpatient, ug 12 ang mga ROF/LSI.

Nakatala usab og tulo ka mga pasyente nga nakarekober sa sakit. Anaa na karon sa 19,598 ang ihap sa mga nakarekober sa dakbayan.

Ang ihap sa mga namatay sa Covid-19 sa syudad anaa sa 853.