LUYO sa bag-ong gipagula nga quarantine classification diin anaa sa Alert Level 3 sama sa Davao City, gidili ang pagpahigayon sa face-to-face (F2F) classes, apan buot karon sa mga magtutudlo nga mag-work-from-home (WFH) sila aron makatabang sab sa pagpakubos sa numero sa paspas nga pagsaka sa kaso sa Covid-19 di lamang sa Davao City kon di sa kinatibuk-an sa nasud.
Sugod karong Byernes, Enero 14, hangtud sa Enero 31, 2022, usa sa gidili nga ipahigayon ubos sa Alert Level 3 mao ang F2F classes, busa buot karon sa mga magtutudlo sa Davao City nga ibalik sila sa WFH nga status.
Sumala ni Alliance for Concerned Teachers (ACT) Davao City Chapter President Reynaldo Pardillo nga buot nilang mapaabot sa nasyonal nga buhatan sa Department of Education (DepEd) ang ilang kahadlok nga basin unya sila mataptan sa Covid samtang naa sila sa tunghaan luyo sa nagkataas nga kaso sa virus ug sa variant niini.
"Tawo lang mi nga magkasakit pod," tipik sa pamahayag ni Pardillo nga nahinabi sa SunStar Superbalita Huwebes sa hapon, Enero 13.
Dugang ni Pardillo nga ang mahimo nila sa tunghaan puwede man sab nila kining mahimo sa ilang mga panimalay aron makubsan sab ang ilang kabalaka sa kaugalingon ug sa pamilya.
Sa nasyonal karon, gipaningkamutan sab sa maong grupo nga matugtan sila sa DepEd aron mapatuman kini sa hinanaling panahon.
"Inisyal nating tagumpay ang pagpayag ng DepEd Central Office na magsuspende ng klase ang mga Schools Divisions Superintendent at Regional Director. Isa itong patunay at pagkilala na lehitimo at may katwiran ang ating panawagan," tipik sa pamahayag sa ACT NCR Union.
Sa kasamtangan ang DepEd Region 11 mihimo na og mga pamaagi ug gihulat ang mando sa nasyonal aron ila kining mapatuman ning rehiyon.