SUGOD karong adlawa, ipa-ubos sa Alert Level 3 ang dakbayan sa Sugbo ug Mandaue hangtod sa Enero 31 gumikan sa pagsaka sa mga kaso sa Covid 19. Ang Level 3, anaa sa tunga-tunga nga situwasyon gikan sa Level 1 nga mao ang labing ubos ug Level 5 nga labing taas. Balik na usab kita ani sa naandan sama niadtong mga panahon nga misaka ang mga kaso sa Covid 19.
Unsa ba ang rason niini? Gumikan ba sa sobra nga kompiyansa? Sa dihang nagsingabot ang Pasko, gusto na nato ang tapok-tapok ug Christmas parties. Ato nang gitugutan ang pagpahigayon og Misa de Gallo night market ug ubang kalihukan. Gibuksan ang malls, gitugutan ang mga bata pagsulod ug gi-abrihan ang ubang venue sama sa mga saloon. Mao na kini ang resulta.
Unya moreklamo na usab ang atong mga lokal nga opisyal sa taga IATF sa kauluhan nganong gibutang kita sa Level 3? Aw, naa may figure hinungdan nga dili kita maka-reklamo. Kita ra gyud usab ang mabasol gumikan sa sobrang kompiyansa. Balik na usab kita sa sinugdanan. Sayang ang atong nakab-ot nga kalampusan kay mobalik naman usab kita sa sinugdanan. Mahimo unta nato kining leksiyon.
SUBURNO SA PAGPANUGA
Dili gyud kalikayan kining mga pagduda nga adunay mga suburno ug padangog nga mga nitabo niining mga linemen nga nagtrabaho karon aron mobalik ang supply sa elektrisidad. Dakong bahin pa sa franchise area sa Visayan Electric Company (Veco) ang wala pa mahibalik mao nga paunhanay ang customers nga mabalik ang supply sa electricity sa ilang mga lugar. Kinsa man ang priority areas sa Veco human sa dagkong transmission o main lines?
Kanang mga secondary sama anang subdivision lines, priority ba kaha kana? Aber, nganong mapasiga man dayon kana itandi sa uban? Dili kaha mohatag og suburno o padangog ang mga lumolupyo anang maong lugar sa mga contractual linemen aron mauna sila? Dili man gyud na kalikayan. Dili maki-angayon kining maong akusasyon apan posibleng may kamatuoran kini. Unfair kini sa mga linemen nga nagtrabaho. Mao nga ang taga Veco nagpahibawo nga i-report ngadto kanila kon adunay nagbinoang sa ilang mga linemen. (bobbygnalzaro@gmail.com)