PLASTADO na ang rota sa grand motorcade sa Sabado, Enero 15, bespiras sa kapistahan ni Señor Santo Niño.

Atol sa press conference nga gitambongan sa kaparian nga gitahasan sa motorkada, kapulisan ug mga representante sa Cebu City, Mandaue City, Lapu-lapu City ug lungsod sa Cordova kagahapon, Enero 13, gilatid na ang final nga rota.

Ang motorkada sugdan sa alas 6:30 sa gabii ug mahuman sulod sa tulo ka oras gikan sa Basilica Minore del Santo Niño ug mobalik sa naasoy nga dapit base sa ilang dry run.

Una, mosubay sa Osmeña Boulevard paingon sa P .Del Rosario paliko sa wala sa dan N. Bacalso subay sa dan paingon sa dakbayan sa Talisay. Gikan sa Talisay mosubay sa dan N. Bacalso liko sa dan Sombria paingon na sa South Road Properties sa Cebu South Coastal Road pabalik sa dakbayan sa sugbo.

Mosubay sa dan M.J. Cuenco paingon sa Barangay Mabolo lahos na sa Barangay Subangdaku ug Barangay Tipolo sa dakbayan sa Mandaue liko sa Barangay Guizo sa nahisgutang siyudad ug padulong na sa unang taytayan sa dakbayan sa Lapu-lapu.

Mopadayon sa Barangay Poblacion sa Lapu-Lapu lahus sa Barangay Babag ngadto na sa Cordova. Sa pagbalik sa dakbayan sa Sugbo, ang imahen sa Santo Nińo moagi sa Cebu-Cordova Link Express Way (CCLEX) balik na sa Basilica Minore del Santo Niño.

Lakip sa walo ka mga simbahan nga hunongan mao ang sentro nga simbahan o parokya sa Talisay, Mandaue, Lapu-Lapu, Cordova ug ubang magian nga simbahan.

Matud ni Police Lieutenant Colonel Wilbert Parilla, deputy city director for operations sa Cebu City Police Office, walay road closure sa siyudad gawas lang kon moagi na ang imahen ug ablihan dayon kon makalabay.

Ang convoy nga sakyanan ana-a lamang sa unom, lakip sa sakyan sa imahen sa Santo Niño.

Hhugot nga gidili sa kapulisan ang pagsunod sa convoy sa way apil sa motorkada.

Si Rev. Fr. Nelson Serda, executive chairman sa Fiesta Senior 2022, nagkanayon nga kining pagpaduol sa imahen sa Santo Niño usa sa mga tulay sa paglaum human sa mga katalagman.

“Santo Niño bato balani sa gugma... This is one way of bringing Santo Niño to them aron ang matag usa makapadayag sa ilang pangamuyo,” matod ni Serda.