GISALIKWAY sa Commission on Elections (Comelec) en banc ang petisyon sa Pilipino Lakas ng Bayan (PDP-Laban) nga paksiyon ubos sa pagpangulo ni Energy Secretary Alfonso Cusi sa pag-abli og balik sa filing sa certificates of candidacy (COC) alang sa umaabot nga national elections, sumala ni Comelec spokesperson James Jimenez niadtong Huwebes, Enero 12.
Matod ni Jimenez, ang petisyon nanawagan sa pag-postpone sa 2022 national election ngadto sa Mayo 2025 gisalikway usab.
“Denied...basta unanimous, it was denied... Both of them resoundingly denied,” matod ni Jimenez.
Matod ni Jimenez, ang petitioners makahimo sa pag-apelar sa Supreme Court.
Ang Cusi faction nipasaka og petisyon niadtong Disyembre 31, 2021, nagkangayon nga ang tanang partido kinahanglan nga hatagan og dugang panahon sa paghukom bahin sa ilang kandidato.
Ang PDP-Laban Cusi faction nahimong wala nay kandidato sa Mayo 9 elections tungod sa pagsibog sa ilang kandidato sa pagka presidente ug bise.
Laing paksiyon sa PDP-Laban ubos sa pagpangulo ni Senator Aquilino Pimentel III nituboy kang Senator Manny Pacquiao nga kandidato sa pagka presidente sa partido.
Sa samang press briefing, si Jimenez niingon nga ang Comelec en banc nisalikway usa sa pagpasaka sa Malasakit Movement nga ma-accredit isip party-list group tungod sa ‘lack of merit.’
"They [were] unable to prove that they represent a marginalized and underrepresented sector,” matod ni Jimenez.(SunStar Philippines)