ANG Department of Education (DepEd) nihatag sa publiko ug pribadong mga tunghaan sa discretion sa pagsuspenso sa mga klase ug ubang teaching-related activities sulod sa Enero 2022 tungod sa nagkataas nga kaso sa coronavirus disease 2019 (Covid-19) sa nasod.

Sa memorandum nga giluwatan niadtong Miyerkules, Enero 12, ang DepEd regional offices (RO) ug schools division offices (SDO) gitugotan nga mohukom sa unang adlaw ug gidugayon sa suspensiyon apan kinahanglan nga dili molapas og duha ka semana o 14 ka adlaw sa paglikay sa taas nga pagbalda sa school calendar.

Ang ROs ug SDOs nga modeklarar sa suspensiyon moseguro usab nga mahulipan kini sa laing mga adlaw sa kasamtangang school year.

Ang DepEd niawhag sa mga tunghaan sa padayong pagpatuman sa mga polisiya nga naghatag og flexibility sa teaching-learning process sa mga tinun-an ug mga magtutudlo.

“All DepEd personnel, teachers and learners are highly encouraged to remain vigilant, observe health and safety protocols and follow IATF (Inter-Agency Task Force) guidelines...” tipik sa memorandum sa DepEd. (SunStar Philippines )