WALA magbinugtong sa paghimo sa krimen ang 18 anyos nga si Ian Rey Baculi sa linuog nga pagpatay kang Kiara Mae Namanama, 10, sa sapa sa barangay Tapul, bukirang dapit sa dakbayan sa Talisay.

Sa interview ni Manlalaban Ruphil Fernandez Bañoc sa iyang programa sa sibyaanang dyHP sa Enero 13, 2022, niangkon si Baculi nga upat sila nga mihimo sa krimen sukwahi sa unang pangangkon niini nga siya ra ang nipatay kang Kiara Mae.

Matod niya nga niadtong Enero 6 sa buntag nakahukom sila sa iyang tulo ka higala nga maligo sa linaw.

Apan sa dihang ilang nasugatan si Kiara Mae, usa sa iyang mga higala nga wala niya itug-an ang ngalan nimando nga sundan ang bata.

Sa dihang naduol na kini kanila, gisignit matod pa, sa tulo niya ka mga kauban ug gidala sa sapa dayon gilumsan.

Iyang gibutyag nga nagpaabot siya sa ibabaw sa sapa samtang gihimo sa iyang mga kauban ang pagpatay kang Kiara Mae.

GISUGO

“Katong akong mga barkada maoy nag sugo...ana siya nga kanang bataa sundi na. Ako ra gisundan. Gisignit nila ang bata..nagpaabot ra ko didto human nilag signit,” matod ni Baculi sa pakighinabi kang Bañoc.

Dugang ni Baculi nga wala sukmaga ang bata, gidiretso ra kini og unlod sa tubigan ug wala na makatingog pa.

Sa dihang wala na molihok si Kiara Mae, gisugo siya sa tulo nga alsahon ug dalhon sa ibabaw sa kalibunan ug didto ilang gipuli-pulihan sa paghilabot.

Gipabiya siya sa iyang mga barkada samtang gi-rape ang bata ug sa iyang pagbalik siya na usab ang nihilabot.

Dili unta niya kini buhaton, apan nadala siya tungod kay gihulga usab siya nga patyon.

Human nila mapahimusli, gisugo na usab siya nga dalhon ang lawas ni Kiara Mae sa baba sa langub sa tago nga dapit ug didto gisalipdan og bato aron dili makit-an.

Gimandoan dayon siya sa usa sa iyang bardaka nga mosibat aron siya ang madudahan nga naghimo sa krimen.

Nipauli siya sa sitio Avocado, Barangay Maghaway sa Talisay ug dayon niadto sa pinuy-anan sa iyang inahan sa Barangay Campo 7, lungsod sa Minglanilla diin siya nadakpan sa kapulisan sa Talisay.

NAGUOL

Iyang giangkon nga sa dihang didto siya sa balay sa iyang inahan, kanunay nalang siya nga naghinuktok ilabi na nga naka hibawo siya nga gipangita na sa mga kabanay si Kiara Mae.

“Sige lang kog hinuktok sa dihang nangita na sila sa bata,” matod ni Baculi.

Andam siya nga mohatag sa tanang impormasyon sa mga pulis sa dakbayan sa Talisay kinsa ang tulo niya ka kauban nga ningpatay ug ninglugos sa biktima.

Matod ni Baculi nga nakonsensya siya ug duha ka gabii siya nga wala makatulog.

Matod niya nga kon iya nang maatubang ang mga ginikanan ni Kiara Mae, andam siya nga mangayog pasaylo apan andam niya nga atubangon ang silot nga ipahamtang kaniya.

Nasayran nga sila si Baculi ug ang biktima managlagyong kabanay human ang ilang apohan mag-agaw, pangangkon niya sa unang pakighinabi sa media.

Gihimakak hinuon niya ang pasangil nga usa siya sa notadong kawatan sa Maghaway sanglit siya lang ang kanunay nga pasanginlan kon adunay kawat sa ilang dapit.

Samtang si Police Lt. Colonel Randy Caballes, hepe sa kapulisan sa Dakbayan sa Talisay, niingon nga ilang susihon ang pangangkon ni Baculi sa interview sa radio station.

“Ato pa nang e validate nang iyang pag-angkon kay kaganina gipangutana siya og usab, wala man mautro ang iyang statement,” nagkanayon si Caballes sa lahi nga interview sa Superbalita Cebu.

LIG-ON

Samtang nagtuo si Caballes nga lig-on ang ilang kaso nga ipasaka batok sa suspek nga si Baculi.

Matod ni Caballes nga alang kaniya dili na kinahanglan ang abogado aron mobarog isip abogado ni Baculi kay dunay mga saksi nga positibong mitudlo sa suspek nga mipatay kang Kiara Mae.

“No need naman nga i kuan siya kay duna man tay mga witnesses, positively identifying the suspect. In fact, naa tay pito ka mga witnesses nga naa sa area nga positibong mitudlo kaniya,” pagpasabot ni Caballes sa Superbaita Cebu.

Dugang ni Caballes nga dili makaingon nga gikuhaan og pamahayag si Baculi nga walay abogado tungod kay ang mga saksi maoy nipamatuod pinaagi sa ilang affidavit nga giluwatan, diin ang tanan nag tudlo kang Baculi nga maoy mihimo sa krimen.

“Wala na kinahanglana ang iyang statement kay ang atong gamiton sa kaso ang testimony man sa mga witnesses, before, during and after sa crime. Naa pud tay usa ka witness nga nakakita nga siya gyud ang naghimo,” dugang ni Caballes.

MIANGKON

Si Baculi dihang gi-interview sa mga tigbalita niangkon nga siya ang nipatay kang Namanama niadtong Enero 6, adlaw sa pagka missing ni Kiara Mae.

Apan nakit-an kini dapit sa langub tungod sa pagdugok sa mga lagong sa palibot.

Ang kaso nga murder batok kang Baculi ipasaka sa labing daling panahon pinaagi sa inquest proceedings sanglit sa pagkakaron nagpadayon pa og himo sa affidavit sa mga saksi.