TUNGOD sa kadako sa ihatod nga shabu sa dakbayan sa Talisay naghimam-hinam na unta nga maka ginansiya ug dako kay bulto man ang order.
Sa pagtuo nga tinuod nga kustomer ang ni order nag dali-dali og hatud apan pwerting kurata nga sa iyang paghatag sa drugas gisuklian pod og posas.
Walay nahimo gawas sa pagbakho nalang kining usa ka inahan nga dunay siyam ka anak nga nailhan nga si Catalina Agustin, 43 ang edad, ug molupyo sa Sityo Alaska Barangay Mambaling siyudad sa Sugbo.
Si Agustin nadakpan pasado alas 10:00 sa gabii adlaw nga Miyerkules didto sa Sityo San Rafael sa Barangay Tangke sa dakbayan sa Talisay dihang gilusad ang pag pangronda sa mga operatiba sa Drug Enforcement Unit (DEU) sa Talisay City Police Station.
Ang maong pag pangronda gipangulohan ni Police Lieutenant Elwood Ebona, team leader sa DEU Talisay Police Station.
Nasakmit gikan kang Agustin ang shabu moabot na sa 200 gramos nga mokantidad ngadto og 1.3 milyones pesos. (Benijie Talisic)