GIPATAS-AN sa Cebu City Government ang implementasyon sa curfew gumikan sa nagkataas nga aktibong mga kaso sa coronavirus disease (Covid-19) sugod kagahapon, Enero 14.
Sa direktiba nga gipagawas ni Mayor Michael Rama, ang curfew magsugod alas 11 sa gabii hangtod alas 4 sa kadlawon sa sunod nga adlaw sanglit gipaubos sa IATF ang Cebu City sa Alert Level 3 sugod sa Enero 14.
Gawas sa curfew, ipaistrikto usab ni Rama ang minimum health protocol sa mga public utility vehicles ug gi-encourage ang commuters nga wala pa magpabakuna sa pagpabakuna na aron adunay proteksyon batok sa Covid-19.
Sayo ang curfew sa mga menor-de-edad nga magsugod sa alas 10 sa gabii hangtod alas 4 sa kadlawon subay sa City Ordinance.
Apan kadtong mga individual nga gikonsiderar nga essential ang ilang mga trabaho walay labot.
“However, the Authorized Persons Outside Residence (APORs), employees of BPOs, health workers,andgovernment agencies providing frontline and emergency services shall be exempted, warkers, cargo vehicles, public transportation, and operating hours of permitted establishments and those offering essential goods and services shall not be restricted by such curfew hours,” dugang sa mayor.
Samtang ang mga PUV gimanduan sa mayor nga adto mopasakay ug mopakanaog sa ilang mga pasahero sa designated jeepney ug bus stops.
Ubos sa Alert Level 2 ug Level 3, ang tanang mga sakyanang pampubliko makapasakay lang hangtod sa 70 porsyento sa iyang kapasidad.
GISUGDAN
Kagabii, gisugdan na sa pagpatuman sa Cebu City Police (CCPO) ang bag-ong mga oras sa curfew.
Matod ni Police Lieutenant Colonel Ma. Theresa Macatangay, information officer sa CCPO, nga ilang gitan-aw unsay mga gidili ug gitugot sa IATF sa Alert Level 3 nga mga dapit aron matunhay ang pagpatuman sa mga lagda.
Usa na ini ang estriktong pagpatuman sa 30 porsiyento nga capacity sa mga establisemento, ilabi na sa mga kan-anan.
Dugang ni Macatangay nga ila nang sugdan ang pagpatuman sa pag usab sa oras sa curfew gikan sa alas 12 sa tungang gabii ngadto na sa alas 11 sa gabii hangtod sa alas 4 sa mga hamtong samtang alas 10 alang sa mga menor de edad.
“Ang atoang curfew inaog siya sa sugod man na alas 12. Karon naa na siya sa 11 pm to 4am so mao na siya ang adjustments part sa all others that are to be implemented based sa categorization of our area sa alert level 3,”matod ni Macatangay.
Hugot usab nga idili ang pag gawas sa mga menor de edad ilabi na ang mga bata sanglit peligro sila nga matakdan sa Covid 19 kon pasagdan sila nga makasuroy-suroy ug mosulod sa mga establisemento.
Apan nipasabot si Macatangay nga mamahimo ra nga makasulod ang mga menor de edad kon gisugo sa ilang ginikanan nga masakiton sa pagpalit og tambal kon walay laing masugo.
Makigtagbo usab ang CCPO sa mga security officers sa mga establisemento lakip na sa mga hotels alang sa bag-ong lagda sa mayor.
NADAKPAN
Samtang daw sa wala mahadlok ang mga tawo sa siyudad sa pagsulbong sa mga kaso sa coronavirus disease 2019 (Covid-19) tungod kay daghan pa gihapon ang nangadakpan sa kapulisan atol sa gilusad nga Oplan Bulabog.
Sa miaging gabii, naka dakop ang CCPO og 129 ka mga tawo nga nakalapas sa curfew ug health protocol apan sa Huwebes sa gabii, Enero 13, moabot sa 122 ang ilang nadakpan sa pag inspeksyon sa 290 ka mga establisemento.
Sa 122 nga nangadakpan, 80 niini nakalapas sa curfew ug 49 ang nadakpan nga walay facemask samtang wala nay naabtan nga nag inom sa publiko nga mga dapit.
Matod ni Macatangay nga sila nanghinaot nga ma edukar na ang publiko sa Oplan Bulabog