NAGHINAM-HINAM ug puno sa kalipay ang gibati sa nag-viral nga Tiktoker gikan sa Davao de Oro human nga natuman ang iyang pangandoy nga makita ang istorya sa iyang kinabuhi sa telebisyon.

Si Diego Pasatiempo Garcia, 25, taga Purok 8, Barangay Mainit, Nabunturan unang nailhan gumikan sa nag-viral niyang mga video sa Tiktok nga nagsugod niadtong panahon nga wala pa mibutho ang pandemya.

Unang na-feature sa "Tunay na buhay" ang iyang kinabuhi dayong gisundan sa programang "MARS pa more," parehong mga programa sa GMA Channel 7.

Sa gihimong pakighinabi sa Superbalita kang Garcia pinaagi sa selpon, gibutyag niini nga wa siya magdahom nga mahimoan og istorya sa programang Magpakailanman ni Mel Tiangco ang iyang kinabuhi nga pagadalhon sa artistang si Miguel Tanfelix, kauban si Paul Salas nga mao sab ang modala sa papel sa iyang igsuong lalaki.

Matud pa nga milungtad og hapit usa ka tuig una nahingpit ang negosasyon sa maong proyekto, sanglit gisugdan kini niadto pang Marso 2021.

Gisaysay ni Garcia nga magtuyok ang istorya gikan sa iyang pagtungtong og high school ug sa iyang pagpanarbaho kon paunsa nga naapektuhan kini sa pandemya ug sa iyang lovelife.

Si Garcia nag-awhag sa mga taga Davao de Oro ug sa mga molupyo sa kasikbit nga probinsiya nga saksihan ang istorya sa iyang kinabuhi alas 8 sa gabii, Enero 15, 2022, sa GMA Channel 7.