ANG lokal nga panggamhanan sa Digos, pinaagi sa ilang Facebook page, nagpahibalo nga sugod Biyernes, Enero 14, 2022, mopahigayon sila og random inspection alang sa mga tawo o indibiduwal nga anaa pa sa gawas gikan alas 9 sa gabii hangtud alas 12 sa tungang gabii, diin pangitaon kanila ang ilang vaccination card.
Subay sa Executive Order No. 53 Series of 2021 sa Siyudad sa Digos, ang gitugutan lamang nga mogawas gikan alas 9 sa gabii padung alas 12 sa tungang gabii kadto lamang mga fully vaccinated.
Sugod sab Biyernes, dunay ginapahigayon nga random inspection sa mga business establishments nga abli gikan alas 7 hangtud alas 11 sa gabii, diin matigayon sab ang random inspection sa mga kustomer gikan alas 9 sa gabii pataas kon sila fully vaccinated nga nasubay sab sa balaod sa curfew.
Base sa Digos City Covid-19 Updates, talaan gikan sa Enero 11, 2022 alas 7 sa gabii pinaagi sa datus sa City Health Office, walay natala nga suspect, diin dunay siyam ka probable, lima ka confirmed/suspected nga anaa karon sa Digoc City Isolation Unit and Other Quarantine Facilities, naa sab ang 15 ka mga persons under monitoring nga gipaubos sa Home Quarantine.
Sa kinatibuk-an sa Digos City, duna nay 4,879 ka mga confirmed cases, 13 ang bag-o, walay natala nga reinfection, 29 ang admitted, 147 ang namatay, walay natala nga bag-ong namatay ug anaa sa ihap nga 4,690 ang mga nakarekober.
Kinsa man ang mga madakpan makabayad og multa, base sa City Ordinance No. 2020-044.
Sa mga indibiduwal, ang first offense anaa sa P2,500 ug mandatory attendance alang sa duha hangtud tulo ka oras nga seminar nga ipahigayon sa City Health Office. Kon dili kini makabayad, mag-render kini og community service. Sa second offense, P3,000, diin kon dili makabayad, mag-render kini og community service ug sa third offense P5,000, kon dili kini makabayad, mag-render kini og community service.
Samtang, alang sa mga business establishments, ang first offense anaa sa P5,000 ug ang second Offense, revocation of business permit o license.