ANG MP Promotions andam mosalmot sa purse bid alang sa mandatory nga away ni Marlon Tapales batok kang IBF-WBA world junior featherweight champion Murodjon Akhmadaliev sa Uzbekistan.

Si MP Promotions President Sean Gibbons nikompirmar sa plano human palabya ang negotiation period alang sa title fight.

Ang purse bid ipahigayon sa Enero 18, matod sa IBF.

“The IBF received a written certification from Sean Gibbons of MP Promotions on behalf of Marlon Tapales indicating that they were not willing to participate in negotiations, and requested an immediate purse bid pursuant to IBF rule,” matod ni IBF President Daryl Peoples.

Ang Minimum nga dawaton nga bid naa sa $25,000 alang sa usa ka title fight tali sa reigning champion batok top 1 o no. 2 contender. Ang winning bid bahinon sa 65/35, diin si Akhmadaliev makadawat sa 65 porsyento sa purse isip defending champion.

Apan si Gibbons nakagusto sa kahigayunan sa 29-anyos nga Tapales nga mopilde kang Akhmadaliev human niya tumbaha sa ikaduhang round sa Hiroaki Teshigawara sa Japan sa ilang title eliminator fight sa undercard ni Nonito Donaire-Reymart Gaballo WBC bantamweight championship sa miaging buwan sa Carson, California.

Si Tapales, usa ka southpaw ug kanhi WBO bantamweight world champion, nitumba sa Haponanon makatulo ka mga higayon alang sa impresibong kadaugan pinaagi sa knockout.

Ang lunad nga taga Kapatagan, Lanao del Norte dunay ring record nga 35-3, dunay 18 ka KOs.

Klaro nga si Tapales mas dunay eksperyensya isip boksidor kay kang Akhmadalie, 27, nakaaway lang og 10 ka mga higayon,bisan kon wa siyay pilde, apil na ang pito ka stoppage.

Isip bronze medalist sa 2016 Rio de Janeiro Olympics, ang Uzbek champion nidaug sa iyang bakus pinaagi sa split decision batok kang American Danny Roman sa Enero 2020.

Siya nakadepensa na makaduha sa iyang titulo, nidaug pinaagi sa TKO sa ikaduhang round niadtong Abril sa miaging tuig ug pinaagi sa unanimous decision batok kang Jose Velasquez duha ka mga buwan ang nakalabay.

Si Akhmadaliev naa ubos sa Matchroom Promotions ni Eddie Hearn. (REV gikan sa spin.ph)