NAPISAT ang usa ka babaye human nalatayan sa dump truck dihang nalagpot sa gisakyang motorsiklo sa Barangay East Poblacion, dakbayan sa Naga, alas 11:54 sa buntag, Biyernes, Enero 14.
Si Mary Grace Del Socorro, 22, dunay kapuyo ug taga Barangay Pardo, dakbayan sa Sugbo namatay diha-diha. Samtang, angol ang iyang kapuyo nga si John Mark Luang Robes, 24, taga Cogon, Pardo, kinsa nagmaniho sa Kawasaki nga motorsiklo.
Si Police Staff Sgt. Aristeo Tampus, imbestigador sa Naga Traffic Police nga nahinabi sa Superbalita Cebu, nagkanayon nga ang mga biktima padulong sa south nga bahin sa probinsiya sa Sugbo aron magdata sa binuwan sa gikuhang motorsiklo.
Sa pag-abot nila sa nahisgutang lugar, kalit nga mi-overtake nila ang usa ka KTM Duke Motorsiklo nga gimaniho ni Nick Jason Candelansa Flores, 35, taga Barangay Tanke, dakbayan sa Talisay, apan naigo ang ilang atubangan nga ligid hinungdan sa pagkatumba sa ilang motorsiklo.
Gumikan sa kakusog sa impact, nalagpot si Del Socorro hinungdan nga naligsan sa nagsunod nga Hino dump truck gimaniho ni Ranuelo Arado Silva, 53, taga Ditsaan Ramain, Lanao Del Sur.
Si Silva naratol ug nidagan gibiyaan ang sakyanan sa ka kahadlok makulatahan.
Samtang gibuhian si Flores human nagkasabot sa kabanay sa biktima nga abagahon ang pagpahiluna sa patay’ng lawas sa biktima.