KABAHIN sa pagtabang sa lungsod nga naapektohan sa bagyong Odette niadtong Disyembre 16, 2021, ang kagamhanan sa lungsod sa Pilar sa mga isla sa Camotes nigahin og salapi isip ayuda ngadto sa lungsod sa Alegria sa habagatan sa lalawigan sa Sugbo.
Si Pilar Mayor Winkey Santiago, pinaagi ni Konsehal Rey Calumpag, nitunol og P100,000 isip tabang sa Alegria.
Nipadala usab ang kagamhanan og pipila ka mga personnel nga motabang alang sa nagpadayong clearing operations sa nahisgutang lungsod.
Gawas sa lungsod sa Pilar, pipila na usab ka mga local government unit (LGUs) ang nipadala og tabang sa habagatang kalungsoran nga gikusokuso pag-ayo ni Odette.
Sama sa lungsod sa Daanbantayan ug Medellin nga mihatag og ayuda ug dugang personnel nga motabang sa nagpadayong pagbangon sa mga Sugboanon sa maong mga lugar.
Sa uwahing datos sa kagamhanan sa lalawigan sa Sugbo, adunay 36 ka mga lungsod ang labihang apektado sa bagyo diin moabot sa 90,000 ka pamilya ang nawad-an og panimalay.