NAGHINAMHINAM ang usa ka inahan sa paghatod sa dakong kantidad sa gidiling drugas aron makakuha og akong suhol aron, matod pa, dunay magasto sa hikay sa piyesta ni Senior Santo Niño sa Dominggo, Enero 16, apan nahimong dulom ang iyang plano human nasikop sa kapulisan sa Talisay.
Walay nahimo gawas sa pagbakho ang suspek nga si Catalina Agustin, 43, dunay siyam ka mga anak, lumolupyo sa Sityo Alaska, Barangay Mambaling, dakbayan sa Sugbo human nasikop sa buy-bust niadtong Miyerkules, Enero 12, alas 10:00 sa gabii.
Si Agustin nadakpan sa Sityo San Rafael sa Barangay Tangke, dakbayan sa Talisay sa mga operatiba sa Drug Enforcement Unit(DEU) sa Talisay City Police Station.
Ang buy-bust gipangulohan ni Police Lieutenant Elwood Ebona, team leader sa DEU Talisay Police Station.
Nasakmit gikan kang Agustin ang shabu nga motimbang og 200 gramos nga mokantidad ngadto na sa P1.3 milyunes.
Matod ni Police Lieutenant Colonel Randy Caballes, hepe sa Talisay City Police Station, nga si Agustin makonsiderar nga high value individual tungod sa kadako sa balor sa mga nakuha nga shabu kaniya.
Ang pipila ka mga barangay sa siyudad sa Sugbo ang iyang hatdan lakip na ang kasikbit nga mga barangay sa Talisay.
Dugang ni Caballes nga usa ka nagngalan og ‘Balo’ nga kanunay nang madunggan ang pangalan nga ana-a sa sulod sa Cebu City Jail maoy supplier sa gidiling drugas ngadto sa dinakpan.
Nagtuo si Caballes nga ang drugas posibleng ibaligya panahon sa Sinulog tungod sa naobsebarhan nga pagsaka sa demanda sa gidiling drugas tungod sa kapistahan.
Si Agustin, dihang gipangutana sa Superbalita ug SunStar Cebu, nitug-an nga niadtong Septiyembre 2021 pa nagsugod siya sa iyang ilegal nga negusyo sa dihang ang iyang igsuon maoy nag-endurso kaniya ngadto na kang ‘Balo.’
Giangkon ni Agustin nga nangindahay siya nga makahikay og ginagmay karong piyesta Senyor kon dako ang iyang ginansiya sa pagbaligya sa drugas.
Sumala ni Agustin, sa matag usa ka bulto nga iyang mahatod ngadto sa kustomer, bayran siya og P2,000 ni Balo.