BISAN sa pagkanselar sa mga kalihukan ug pasundayag sa Sinulog 2022, mopadayon gihapon sa paghalad og sayaw si Cebu Governor Gwendolyn Garcia atubangan sa Cebu Provincial Capitol building atol sa kapistahan ni Sr. Santo Niño sa Dominggo, Enero 16, 2022.

Si Garcia mohalad sa iyang ika-dose nga pagsayaw sa kapistahan.

Tungod kay anaa pa ang hulga sa coronavirus disease (Covid-19), subay sa protocol, iyang ipasalida ang nangaging mga performance sa gobernador nga makita online.

“This is going to be a production, lahi man ni sa live, kay what we will be presenting will be a video of the Halad sa Sto. Nino,” matod ni Garcia.

Kuyog sa gobernador sa pagsayaw ang 10 ka Provincial Board members.

Ang Sinulog usa ka sayaw sa pag ampo. Usa sa iampo ni Garcia mao ang kanunay nga pagpanalipod sa Sugbo ug mga Sugbuanon sa mga kalamidad ug sa bisan unsa nga mga hagit.

“As always gyud, the continued protection for Cebu and all of the Cebuanos especially to help us in recovering from typhoon Odette and all other threats including Covid-19. I really really hope that this year will be a much much better year for our province. Maningkamot sad gyud ko nga ato ning mapabangon usab,” matod ni Garcia.

Si Garcia una nga nisayaw sa Sinulog sa 2005 hangtod sa kontrobersiyal niini nga pag sayaw sa 2013.

Sa iyang pagbalik sa Kapitolyo sa 2020, ni-balik usab siya og sayaw kauban ang mga department head sa Kapitolyo lakip na ang tanan nga board members.

Ang tanang kulturanhong mga kalihukan sa Sinulog wa idayon karong tuiga sa Dakbayan sa Sugbo tungod sa hulga sa Covid-19, labina sa Omicron variant.

Nisamot na nga niadtong Enero 14, ang Cebu City ug Mandaue nalakip na sa mga dapit nga gipailawom sa Alert Level 3.

Ang Lalawigan karong Emero 16, Dominggo ubos na sab sa Alert Level 3.