Binghay: Kinsa ang broken hearted?

DAGHAN ang nag-ingon nga mas bali pa ang mawad-an og hinigugma unya ma heart broken kaysa wa kasuway nga mahigugma o gihigugma.

Kon hisgutan na gani ang emusyon nga naglambigit sa kasing-kasing, mahimo kining usa ka grasya o katalagman depende sa relasyon.

Sa artikulo nga namantala sa Psychology Today, 60% sa mga Americano nakasinati og ‘love at first sight’, tingog sulod sa lawas nga nag-ingon nga imo nang nakita imong soul mate. Apan sa paglabay sa mga katuigan, kini nga pagbati balik balik nga masinati sa ka daghan nga besis hangtod maka-kaplag sa gipanghinaot nga ‘forever’.

Ang ka apan kon di kini molahutay unya magkabuwag. Ikaw nga nabiyaan ma broken hearted. Magpunay na lang ka og hilak sa kamingaw ug mahinuklog sa tam-is nga kagahapon.

Kasagarang mga na heartbroken padayon gihapon sa ilang inadlaw nga tulumanon. Bisag sakit ang dughan, mo pahiyom lang gihapon aron matabunan ang sakit nga gibati.

Unsa may timailhan sa na heart broken?

Bation ini niya ang labad sa ulo, way ganang mokaon, kuwang o way klarong katulog, lapoy ang kalawasan, sakitan sa tiyan unya ang uban nga magrabihan bation og pagpanghuot sa dughan. Kon kini di ma agapan, dilikadong mo resulta sa mas seryusong problema sa panglawas.

Di na sab kaayo ni siya mag apil-apil sa iyang naandang kalihukan kay sakit pa man sa iyang panumduman ang mga kahigayunan nga kuyog niya iyang kanhi minahal maong mas ganahan pa kining mag-inusara kay sa hisgutan ang sakit nga gibati.

Kasagaran ma apektuhan sab ang iyang trabaho kay kuwang na man sa konsentrasyon unya di sab kalikayan nga mokalit lang og tulo ang luha bisag wa tuyoa.

Di na sab kini ganahan mangariglar sa kaugalingon kay paminaw ini wa namay nagmahal kay nawala naman iyang inspirasyon. Ang uban nga magrabihan di na halos maligo.

Mag maoy unya magsegi og mokmok sa ngitngit nga lugar.

Atangi ang akong sunod nga lindog sunod Sabado kay akong tukion ang mga paagi kon unsaon pagtabang ang mga victims of love.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph