Usa ka Japanese national nga gituohang nalumos napalgang naglutawlutaw sa kadagatan sa South Road Properties (SRP) pasado alas 2:00 sa Biyernes sa hapon, Enero 14, 2022.
Si Police Staff Sergeant Reynato Baldo sa Mambaling Police Station nga maoy nag imbestigar, niila sa biktima nga si Tadao Tamayama, 69, taga Pasig City,. Metro Manila.
Matod ni Baldo nga si Tamayama nailhan lang base sa iyang lisensiya sa pag drive nga nakasulod sa atubangan sa bulsa sa iyang maong nga pantalon.
Dugang ni Baldo nga gawas sa driver’s license ni Tamayama, duna usay duha ka mga selpon nga na-recover gikan sa bulsa sa langyaw.
Nasayran nga ang Mambaling Police gipahibawo kalabot sa pagkakaplag sa lawas nga naglutaw-lutaw sa kadagatan.
“Sa atong nakita, wala man siya samad pero magpaabot lang mi sa findings sa iyang autopsy report kay sa among nakita inisyal walay samad but magpaabot ta sa resulta sa medico-legal aning biktima,” matod ni Baldo.
Dugang susihon sa Mambaling Police Station ang gipuy-an niini dinhi sa Sugbo.
Susihon usab sa Mambaling Police Station ang Japanese Consulate dinhi sa Sugbo kon abli ba kay wala may trabaho.
Dili pa makasulti ang kapulisan kon unsay laing posibleng gikamatyan sa Hapon gawas sa pagkalumos.