Kasong murder batok sa suspek sa pagpatay kang Kiara Mae Namanama hingpit nang napasaka sa korte niadtong Biyernes, Enero 14, human nakompleto ang mga pamahayag sa pito ka mga saksi sa krimen.
Matod ni Police Lieutenant Randy Caballes, hepe sa Talisay City Police Station, nga niadtong hapon sa Biyernes sa wa pay alas 5:00 nasang-at na ang kaso batok kang Ian Rey Baculi, 18, ngadto sa Talisay City Prosecutor’s Office.
Si Baculi giingong niangkon nga nituok, nilumos sa sapa ug nidala kang Namanama ngadto sa langub ug giingong gipanamastamasan bisan ang bata patay na.
Matod ni Caballes nga niadto ra untang Huwebes, Enero 13, mapasaka ang kaso apan tungod sa pag-usab sa testimonya ni Baculi dihang nahinabi sa sibyaanan sa radio, diin siya nialegar nga upat silang nihimo sa krimen.
Iyang gipasusi sa imbestigador nga naghawid sa kaso kon unsa kini ka balido,mga ngalan gihatag ni Baculi nga iyang gipangtumbok nga iyang mga kauban sa pagbuhat sa linuog nga krimen.
Human masayod, boluntaryong ningbisita ang tulo, kinsa wa nganli sa kapulisan, apan nasuta nga ang tulo pulos gikaaway ni Baculi tungod sa giingong di maayong pagkatawo sa suspek.
Ang mga amo sa tulo nagdala og mga kamatuoran nga dihang nahitabo ang krimen niadtong Enero 6, 2022, sila naa sa ilang tagsa ka trabahoan.
“Wala na gyud siya sa insaktong pag tubag. Kini siguro tungod sa gihasol siya sa biktima kay mao mana iyang gitug-an nga magsige og pakita ang biktima,”matod ni Caballes.
Si Kiara Mae na missing niadtong Enero 6 dihang niapas kini sa iyang inahan nga nanglaba sa sapa sa Brgy. Tapul, bukirang dapit sa dakbayan sa Talisay.
Nakaplagan ang iyang lawas nga nagkadugta na sa Enero 9 sulod sa usa ka langob tungod sa kadaghan sa mga lagong.
Ang Talisay City Police padayon pa gihapon sa pagpaabot sa resulta sa awtopsiya sa biktima aron mahibaw-an kon madugangan ba ang kaso og rape base sa resulta niini.