Gipahibawo sa Department of Health sa Central Visayas (DOH 7) ang kanihit sa suplay sa basic nga mga tambal sa rehiyon, partikular na sa Sugbo.
Si Dr. Mary Jean Loreche, DOH-7 chief pathologist, niklaro sa isyu sa kanihit atol sa iyang press briefing sa Visayas Vaccination Operations Center (VVOC) niadtong Biyernes, Enero 14, 2022.
“It is true that there is scarcity of supplies. Again, this is an issue on supply and demand,” matod ni Loreche human motan-aw sa sitwasyon taliwa sa pagnihit sa batakang mga tambal sukad nga ang Omicron variant naghulga sa nasod.
“Yan po ang totoo, meron tayong problema sa ating supplies ng basic na mga gamot para sa ubo at sa lagnat,” dugang niya.
Matod ni Loreche nga nakigtagbo sila sa mga botika ug mga drug store sa Sugbo uban sa Office of the Presidential Assistant for the Visayas (OPAV), Inter-Agency Task Force (IATF) Visayas, ug Project Balik Buhay (PBB) sa wala pa ang iyang briefing.
Nagtuo siya nga ang problema dili lang sa rehiyon nasinati kondili sa tibuok nasod, sanglit ang tanang drug stores nga dagko o gamay mipadayag sa samang kabalaka.
Gitataw sa labaw nga pathologist nga nagsalig sila sa mga ihatod gikan sa mga supplier aron mapuno ang mga stock, labi na sa paracetamol ug mga tambal sa ubo.
Samtang wala pa moabot ang suplay, giawhag ni Loreche ang tanan nga gamiton ang bisan unsang brand, nitataw nga ang generic nga mga tambal sama ka epektibo sa mga branded.
Giawhag usab niya ang tanan nga magpabiling kalmado ug dili mag-panic taliwala sa kakuwang sa suplay samtang gihangyo usab niya ang tanan nga dili tagoan ang mga tambal alang sa ilang kaugalingon nga konsumo.
“Kami po ay nanawagan sa ating mga kababayan mga Sugbuanon, wag po tayong mag panic, wag po tayong mag hoard, kaya po natin ito tulong-tulong po tayong lahat,” matod ni Loreche.
Isip alternatibo, si Loreche miingon nga ang mga tawo nga adunay trangkaso mahimong makainom og turmeric, luy-a, ug lemon.
Gitambagan usab niya sila nga mag-inom og bitamina ug mokaon og berde nga dahon nga mga utanon.
Ang DOH ug Department of Trade and Industry (DTI) sa sayo pa nipagawas og Joint Memorandum Circular No. 22-01 nga nag-awhag sa mga retailer nga limitahan ang pagbaligya sa 500 mg tablets sa paracetamol ngadto sa 20 kada tawo o sa 60 kada panimalay lamang.
Apan gipadayag ni Loreche nga kinahanglan usab nga moluwat og advisory ang nasudnong kagamhanan aron limitahan ang pagpalit sa mga tawo gikan sa ubang mga lugar nga posibleng adunay distribution control.