Nakutaw gyud ang utok sa usa nako ka kaila nga abogado. Ngano kunong daghan ang motuo anang Tallano gold? Matod pa, kining Tallano gold masubay pa ngadto sa Solomon’s gold.
Dayon tungod ni Jose Rizal, nga nakadagan dihang gipusil siya sa Bagumbayan (Luneta), ang maong gold naa karon sa Swiss bank accounts nga si Ferdinand ‘Bongbong’ Marcos Jr. lang makakuha kon makadaog siya sa pagka presidente sa Pilipinas.
Grabing bahakhak nako dihang gi-asoyan niini. Apan makahilak sab ngano tuod dunay motuo. Klaro man kining inimbento. Hinanggaw pa gyud pagka imbentoha.
Akong gihisgutan ang laing kaila dihang nangape mi. Ug iya sab nga giistorya kanako ang hinubog nga kukabildo diha sa iyang tindahan sa Minglanilla.
Matod pa sa usa sa mga hubog, angay kitang magpasalamat sa social media sama sa Facebook ug Tiktok kay niguwa na gyud ang tinuod.
Niingon siya nga sulod sa pipila ka dekada, ang media apil na ang mga history books ug kining atong edukasyon naghungit kanato og mga bakak.
Di man tinuod kuno nga daghan ang gipangpriso ug gipapatay ni Ferdinand Marcos ubos sa martial law. Di tinuod nga hapit gihurot og kawat ni Marcos ang bahandi sa nasud. Di tinuod nga nalukapa ang atong ekonomiya. Di gani tinuod nga gipapatay si Ninoy Aquino.
Apan salamat sa social media, niguwa na gyud ang tinuod.
Ang nakalingaw lang kay dunay laing hubog nga niingon nga di gyud hinuon motuo anang Tallano gold. Oy, nasuko man ang loyalista ni Marcos.
Niresulta kini sa grabing lalis nga hapit moabot sa sumbagay. Maayo gani kay giuwang sila ug gipapauli.
Survey
Nakita nako sa giingong nag-una si Marcos Jr. sa mga survey. Ubay-ubay gyud diay ang nituo nga ang panahon sa iyang amahan mao ang golden years sa Pilipinas. Dili sila motuo sa mga nakasinati gyud sa panahon sa diktadurya.
Bahalag moguwa sila nga kataw-anan. Moinsister man sila nga sa ilang kadaghan, wa gyud sila masayop. Kon duna may molalis, dali silang masuko ug makig-away.
Nakalitan gani ko nga bisan sa usa ka survey dinhi sa Sugbo, kuyog kaayo si Marcos Jr. Giingon nga layo nga ikaduha si Sen. Manny Pacquiao ug ikatulo si Vice President Leni Robredo.
Bisan pa man, kining giingong kusog nga survey ni Marcos Jr. angay makaaghat sa mga Sugboanon nga mangusog pa sa ilang kampanya.
Si Pacquiao klarong anti-Marcos. Nakita nato kini dihang nihalad siya og buwak sa marker diha sa Tisa, Syudad sa Sugbo, diin gitiman-an asa gidagit si Fr. Rudy Romano.
Si Robredo, sa iyang bahin, gipaluyohan sab sa liboan nga mga anti-Marcos nga Sugboanon.
Belib man gani ko ni Kong. PJ Garcia tungod sa iyang hugot nga pagsaway kang Marcos Jr. Kuyog baya kini siya kanamo nga mga student activists niadtong panahon sa among pagka batan-on.
Dayunyor
Naa lang koy nakitang pasiaw sa sigi nakong gamit nianang ngalan nga Marcos Jr. Buot ipasabot ba kini nga junior lang gyud diay kini si Bongbong. Wala makatupong sa ka maayong-laki sa iyang amahan.
Aw, topnotcher gani ang senior. Apan dropout ang junior. Naila sab nato nga Amerkana ang nahimong kabit sa amahan nga mao ang aktres nga si Dovie Beams. Wa lang koy nadunggan nga nalambigit kang junior. Laing buot ipasabot ra ba daw sa Englis kay ang dayunyor “tiny.” (DM kanako sa @anol_cebu)