Mosumad na karong adlawa, Enero 16, ang pagka missing sa 11 ka mga tripolante sa tugboat M/V Strong Trinity nga nahanaw sa pagkuso-kuso sa bagyong Odette niadtong gabii sa Disyembre 16, 2021.

Ang tugboat katapusang nakit-an sa kadagatan sa Dakbayan sa Talisay aron unta mopasalipod gikan sa bagyo, apan gihapak sa dagkong mga bawod ug hangin.

Ang Philippine Coast Guard (PCG) Cebu wa pay kasayuran sa nahimutangan sa tugboat ug 11 ka mga crew.

Samtang tulo nalang sa pito ka mga tripolante sa M/V Ida ang wala pa maugkat gikan sa nalunod nga tugboat nga nag-angkorahi sa pantalan sa Barangay Tayud, lungsod sa Consolacion sa Disyembre 16.

Matod sa kumander sa PCG Cebu, Captain Alvin Dagalea, nga usa na ka buwan ang milabay human nga ma missing ang mga tripolante sa duha ka mga tugboat, wala pa sila nideklarar nga undangon na ang pag pangita sa mga tripolante.

WA GIHUNONG

“Sa karon, Sir, wala pata nag terminate sa atong search and retrieval operation sa kadtong mga nanga missing although almost one month na. Kasi we’re still hoping nga makita sa traces ba, ilabi kon dunay mga oil spill nga atong makit-an,” matod ni Dagalea.

Dugang ni Dagalea nga sa milabay lang nga mga adlaw, ang Philippine Navy uban sa Philippine Army nitabang na usab kanila sa pagpangita sa mga nanga-missing nga tripolante sa Strong Trinity.

“Ang atong Navy nag padala pud sila og sonar equipment sa lawod. Gani nag conduct sila few days ago but initially negative gyud base sa ilang report. Wala silay nakita didto sa area kadtong gihatag gani sa shipping company katong last nga coordinate nila,” dugang ni Dagalea.

Niadtong Huwebes, Enero 13, ang mga pamilya sa 11 nga nanga-missing nibisita sa PCG District Office ug gipasabot kon unsa ang gihimo nga mga pagpaningkamot sa PCG-7 ug ingon man sa shipping company.

“’Mao gani to, Sir, sa among pakig-estorya sa pamilya sa kadtong mga nanga-missing nga gipahibawo namo sila nga continue pa gihapon ang search and retrieval operation sa mga na missing nilang kabanay,” pasabot ni Dagalea.

Sa kasamtangan ang PCG Cebu naninguha nga kon duna silay masigpatan nga oil spill sa kadagatan sa dakbayan sa Talisay, ilang sawmon aron pagsuta kon dala kini sa tugboat nga gisakyan sa 11.

Samtang upat nga naugkat nga mga tripolante sa M/V Ida nailhan nga sila Luciano Roble, master; Arthur Sarveda, chief engineer ; Ricardo Payot Jr. - (ordinary seaman) OS ; ug Richard Marilao, chiefmate.

Pabilin pang missing mao sila Ronel Fernandez, Artemio Bondaog, ug Rolly Cornejos.

WAY TABANG?

Samtang si Flora Mae Torres, asawa ni 3rd Engineer Fritz Gerald Torres, 28, usa sa mga tripolante sa M/V Strong Trinity, nibutyag nga nasagmuyo sila sa Key West Shipping Lines Corp. tungod kay matod niya dili sinsero ang maong kompaniya sa pag pangita sa nanga missing nga mga tripolante ug pagtabang sa mga nahabiling pamilya.

Matod ni Flora Mae nga siya nasagmuyo dihang nihangyo unta sila uban sa ubang mga pamilya sa mga tripolante nga nangamissing nga mahatagan og kapuy-an kining mga pamilya nga ana-a sa Sugbo sanglit ang uban kanila taga Mindanao.

“Giingnan rami sa text, kay amo man to gi text, apan gitubag ra intawon mi nga dili sila ka provide kay tungod nakahatag na ang kompanya og P10,000 nga financial assistance,” matod ni Flora Mae.

Dugang niya nga usa sa ilang gikasakitan kay ang Key West ulahi na nipahibawo kanila nga nanga missing na ang ilang kabanay kon wala pa sila naningkamot nga maoy mikontak sa kompaniya.

“Kay sa ato nga higayon, Sir, wala dayon sila ni inform namo nga mga pamilya, nianang petsa 17 sa hapon mga alas 4 to, nangita pako og signal kay lage walay signal niadtong tungora. Ni- chat ko sa mga kauban sa akong bana ug gitubag ko basin ug napadpad lang to sa boho,”dugang ni Torres.

Tungod kay wala siya mahimutang nga hapit na mag 24 oras wala pa gihapon kini kasayuran sa nahitabo sa iyang bana, niadto siya sa opisina sa shipping lines.

“ Mao to,Sir, pag- adto nako didto sa ilang office ug ang gwardiya ang nipahibalo ra nako nga nalunod daw ang barko ug akong gipangutana kon nganong kabalo man siya, ingon ang guard nga naay usa ka survivor nga bag-o lang niabot,” dugang ni Torres.

NAG CHAT PA

Si Torres ug iyang bana nga si Fritz Gerald, nag chat pa sa hapon sa Disyembre 16 nagka chat-chat. Nipahimangno kaniya nga dili nalang motrabaho kay kusog na ang hangin. Hangtud sa gabii nag chat pa ang duha apan sa alas 8:41 nianang gabii sa petsa 16, maoy katapusan nga chat sa iyang bana nga niingon nga lisod na kaayo sila.

“Dawat na nako ang kamatuoran ang ako lang nga mapahiluna namo ang akong bana kon patay naman gani,” dugang niini.

Ang magtiayong Torres bag-ohay palang nakasal, gani wala pa silay anak.

Samtang ang human resource manager sa Key West Shipping Lines Company nga si Mc Zabnar Narvasa, dihang gisulayan sa Superbalita Cebu og tawag, gitubag ang maong selpon, apan giputol ra dayon./

Sa pila ka higayon nga pagtawag, dili na makontak ang maong number.