Niabot na og 63 ka mga barangay ang adunay pagpanakod sa coronavirus disease 2019 (Covid-19) nga unta upat ra ka mga barangay ang dunay aktibong mga kaso niadtong Enero 1, 2022.
Sa Sabado, Enero 15, 2022, nitabok na sa 2,000 ka aktibong mga kaso ang natala sa Dakbayan sa Sugbo human dunay nadugang nga 438 ka bag-ong mga kaso.
Base sa talaan sa Department of Health (DOH) 7, niabot na og 2,096 ka aktibong mga kaso sa kinatibuk-an ang naa karon sa Cebu City.
“We are expecting this to rise for the next 2 weeks or so. So, we’re expecting everyone’s cooperation. We should be in this together, together in our protocol compliance. We can weather this, amping unya ampo sad. Kaya nato ni. Viva Pit Señor!,” matod pa ni Cebu City north district Councilor Joel Garganera, deputy chief implementer sa Cebu City Operations Center (EOC).
50 PORSYENTO
Sa interbyu sa Superbalita Cebu sa Sabado, Enero 15, si Garganera nibutyag nga sobra sa 50 porsyento sa aktibong mga kaso ilang gipa home isolate kay kadaghanan asymptomatic ug mild.
Matod ni Garganera nga daghan na karon sa mga tawo ang nasayod nang unsay buhaton kon nagpositibo sa Sars-CoV-2, kagaw sa Covid-19.
“Most of them are isolated,” matod ni Garganera. “These people are already aware..If you are fully vaccinated, you can self isolate,” dugang sa konsehal.
Nagtuo siya nga mao kini ang rason kon nganong gamay pa ang naa sa mga tambalanan karon.
Apan sa samang higayon, iyang giawhag ang hospital administrators nga kon asymptomatic o mild ang kaso sa usa ka pasyente, hatagan gilayon kini og medical clearance aron makapauli ug sa balay na mag isolate.
Kini aron malikayan nga mapuno ang tambalanan nga alang lang sa grabeng mga pasyente sa Covid-19.
Iya usab nga giawhag ang mga namuyo sa subdivisions ug condominium nga di mahadlok kon dunay magpositibo sa virus sa ilang dapit.
Inay kahadlukan, ila kining tabangan nga maulian gilayon.
Gipaneguro usab ni Garganera nga ang mga balay sa nag self isolate ilang gipangsusi samtang ang mga barangay “very cooperative.”