LAING all-Filipino world title fight ang nalantawang mahitabo sa umaabot.
Kini human sa makapaukyab nga 3rd round knockout nga kadaugan ni Jade Bornea batok kang Mohammed Obbadi niadtong Sabado sa gabii, Enero 15, 2022 (RP time) sa Monterrey, Mexico.
Sa kadaugan, ang 26 anyos nga si Bornea maoy nahimong mandatory challenger ni International Boxing Federation (IBF) super flyweight champion Jerwin Ancajas.
Hinuon nagdepende pa ang tanan sa resulta sa umaabot nga away ni Ancajas batok kang Fernando Martinez sa Argentina sa sunod buwan.
Kon modaog si Ancajas ning awaya, hayan mohayag ang poruhan nga madayon ang ilang panagtagbo ni Bornea, kinsa adunay 17-0, 11KOs nga rekord.
Apan kon mahan-ay og balik ang unification bout nila ni Ancajas ug World Boxing Organization (WBO) super flyweight king Kazuto Ioka, hayan maghuwat og taas-taas nga panahon si Bornea una siya makapanuktok alang sa world title.
Sa sayo pa, nakaeskedyul na unta ang panagsangka nila ni Ancajas ug Ioka apan nauswag kini sa wala matino nga petsa gumikan sa Covid-19.
Si Bornea, kinsa lumad nga taga Arakan, Cotabato Del Norte, usa sa mga Pinoyng boksidor nga nahimo nang sakop sa bag-ong promotional boxing outfit nga Probellum Promotions.