ALANG ni Filipino boxing analyst Dennis Principe, 50-50 ang purohan ni Filipino featherweight prospect Mark Magsyao nga modaog batok kang World Boxing Council (WBC) featherweight champion Gary Russell Jr. sa ilang away karong Enero 22, 2022 sa Borgata Hotel Casino & Spa sa Atlantic City, New Jersey.
Nakasulti si Principe niini gumikan kay kakusog sa kumo ni Magsayo.
“I like his chances, it’s maybe 50-50. ‘Yung puncher’s chance, na kay Mark Magsayo,” batbat ni Principe sa programang Power and Play.
Apan giangkon ni Principe nga usa kini ka malisod nga tahas alang sa lumad nga Boholano gumikan kay tataw nga dako ang bintaha ni Russell kon hisgutan ang abilidad ug kasinatian.
Sa tan-aw ni Principe, si Russell ang labing maayo sa tanang world champions sa featherweight division.
“I still feel right now na medyo napaaga siya kay Gary Russell,” dugang ni Principe.
“Or he should have taken 1 or 2 more tune-up fights or aim for the other champions, because para sa akin, as Mark Magsayo is concerned, pinakamahirap among all champions ‘yung Gary Russell.”
Hinuon matod ni Principe nga ang nakanindot lang ning awaya alang kang Magsayo mao ang ganti nga iyang madawat hilabi na sa estado sa iyang pagka-boksidor.
Kon modaog si Magsayo ning sangkaa, nagtuo si Principe nga mosikat kini og kalit.
“The beauty of a victory kung sakali, yung inaantay niyang stardom, from prospect to a legitimate superstar, in an instant, mangyayari yan kung tatalunin niya si Gary Russell Jr,” pasabot ni Principe.
Naangkon ni Magsayo ang katungod sa pag-challenge ni Russell human sa iyang 10th round knockout nga kadaugan batok kang Julia Ceja sa miagi niyang away.
Si Magsayo naggunit og 23-0, 16KOs nga rekord samtang si Russell adunay 31-1, 18KOs nga baraha.
Sa laing interbyu, giklaro ni Russell nga wala siya nahadlok sa knockout punching power ni Magsayo.
“I see [Magsayo] as a good even-handed puncher, maybe he leans a little more to the right hand. He has good punching power, but none of that matters if you can’t hit your target,” asoy ni Russell.
“We’re grinding in training camp. No matter what, we’re not going to make any excuses or complaints.”