USA ang patay samtang duha ang angol ug nasikop usab ang duha ka sakop sa New People’s Army (NPA) atol sa engkwentro tali sa mga sakop sa 2nd Infantry Battalion Philippine Army sa sitio Manlibud Barangay Sandayao, Guihulngan City Negros Oriental Sabado sa alas 8 sa gabii, Enero 15, 2022.
Gibanabana 12 ka mga sakop sa Communist Terrorist Group ang naengkwentro sa mga sundalo nga milanat og lima ka minutos sa wala pa miatras ang mga armado.
Sa ilang pagsusi, misugat sa panan-aw sa mga sundalo ang pat-ak pat-ak sa dugo sa dapit nga gituohan nga gikan sa mga rebelde.
Dali nila nga gisik-sik ang mga kasagbutan ug didto ilang nakita ang usa ka lalake nga wala nay kinabuhi nga giila nga si Arnold Suerte nga nagpuyo sa sitio Manlibud, Barangay Sandayao, siyudad sa Guihulngan, Negros Oriental.
Nakuha usab nila ang duha ka laing sakop sa NPA nga samaran nga giila nga si Wendel Julian, 22, taga Barangay Trinidad, Guihulngan ug usa ka 17 anyos nga gidala na sa ospital.
Gikustodiya na usab sa kapulisan sa maong siyudad ang duha ka lalake nga gitumbok nga sakop sa NPA nga silang Ree-Chie Sabillo, 22 ug usa ka 15 anyos.
Nasakmit sa mga sundalo ang usa ka KG9 submachine pistol nga dunay 29 ka bala niini, usa ka Colt .45 ug .37 ka mga bala sa kalibre .45 ug .357.
Ang duha nga namatay ug ang mga nadakpan lakip na ang naangol giingong sakop sa Komiteng Rehiyon-Negros, Cebu, Bohol, Siquijor (KRN-CBS).
Nagpadayon pa usab ang gihimong imbestigasyon sa kapulisan labot sa presensya sa mga NPA sa dapit.