WALAY nadakpan nga mga batan-on nga nipahigayon sa street party sa dakbayan sa Sugbo atol sa kapiyestahan ni Señor Santo Niño kagahapon, Enero 16, matod ni Police Major Armando Labora, hepe sa Abellana Police Station sa dakbayan sa Sugbo.
“Ang kaning akong area kabalo naman gyud ka nga kaning akong area mao man gyud ni ang dunay daghan mag-party, pero karon wala gyud mi nalabyan nga nag-party-party wala pud nanawag sa amoa,” matod ni Labora.
Unom ka mga barangay ang sakop sa Station 2 nga gilangkuban sa mga barangay Santa Cruz, Cogon Ramos, Sambag 1, Sambag 2, Kamputhaw ug Capitol Site.
Apan lahi nga kalingawan ang ilang naabtan. Usa ka tigbakay sa Sityo Upper Kawayan, Barangay Sambag 2, pasado ala 1:00 sa hapon sa Dominggo, Enero 16, diin upat ka mga sugarol ang ilang nasikop.
Ang mga dinakpan nailhan nga sila Radcon Joseph Sagarino, 32; Redeemer De los Santos, 32; Raymundo Templado, 59; ug Carlito Baluarte, 40, pulos molupyo sa Barangay Sambag 2.
Matod ni Labora nga kining upat nadakpan atol sa gihimong pagpatrolya nila ug naabtan ang gihimong tigbakay sa lugar.
Naimbargo sa Abellana Police Station atol sa tigbakay ang duha ka patay nga mga manok pangtari, ug kwarta nga P400 nga maoy pusta.
Kaso nga kalapasan sa illegal nga sugal o tigbakay ang atubangon sa mga dinakpan.