ANG mga magtutuo giawhag sa pagpakita sa ilang debusyon sa Senior Sto. Niño pinaagi sa makahulugong aksiyon.
Mao kini ang sentro sa wali ni Cebu Archbishop Jose Palma atol sa misa sa 457th Fiesta Señor Pontifical Mass Fiesta Day kagahapon sa buntag, Enero 16, 2022.
“Ang hagit, ang hangyo sa Niño, tungod kay kita manag-igsuon. Tungod kay kita nakakita sa gugma sa Diyos alang natong tanan, unta ipakita nato kini pinaagi sa atong buhat — pagtinabangay, pagtinambayayong alang sa tanan,” matod ni Palma.
Uban niini, si Palma niawhag sa mga magtutuo nga motan-aw sa mga kaayohan sa uban, dili lang alang sa ilang kaugalingon.
Matod niya, wala nay panginahanglan nga mohimo og misyon sa gawas sa nasod, naa lang sa kasilinganan ang angay tabangan human sa pagkusokuso sa bag-ong Odette ug ang nagpadayong hulga sa Omicron variant sa coronavirus disease 2019 (Covid-19).
Bisan unsang matang sa tabang, pagtunol sa relief goods o pagserbisyo, matod ni Palma, maghatag sa uban og paglaum nga mabangon gikan sa kalisdanan.
Si Palma nagkanayon nga si Señor Sto. Niño (batang Hesus) maoy tinubdan sa kahiusahan taliwala sa grabeng katalagman nga nahiagoman sa katawhan sa bagyo ug paspas motakod nga Covid-19 variant.
“Kini pagpakita sa atong panaghiusa sa Sto. Niño. Kini pagpakita sa kinabuhi nga atong nadawat isip mga anak sa Diyos. Kini pagpakita sa atong mission isip magtutuo nga makaingon nagsaulog kita sa 500 YOC (Years of Christianity), nagtuo kita sa Niño ug makita kini sa pagtambayayong ug pagtinabangay,” pahayag ni Palma.
Gidugang niya nga dakong pribilihiyo nga nakahimo sa pagsaulog sa kapistahan ni Señor Sto. Niño uban sa limitadong paglihok sa pagsunod sa lagda sa Inter-Agency Task Force (IATF).
“Sto. Niño, tuburan sa panaghiusa panahon sa kalipay ug pagsulay. Ug karon nga niagi ang Odette ug bisan dinhi pa ang Omicron, tigom gihapon kita para sa Sto. Niño,” pulong ni Palma nga malipayon ug mapasalamaton nga minilyon gihapon ang nagpakita sa ebosyon gikan sa motorkada niatong Sabado, Enero 15 ug kahulogan sa piyesta kagahapon, Enero 16.