GITAHO sa Bureau of Fire Protection (BFP) ang gibanabana nga danyos nga P200,000 sa 26 ka mga balay nga nasunog sa may Bolton Bridge sa Quimpo Boulevard ning Siyudad sa Davao niadtong Sabado sa buntag, Enero 15, 2022.

Si Senior Fire Officer 4 Ramil Gillado, chief of Intelligence and Investigation sa Davao City Fire District, nagsulti sa SunStar Davao sa paghinabi pinaagi sa telepono Dominggo, Enero 16, nga 24 ka mga balay ang "totally damaged", samtang duha ang "partially damaged."

Subay sa City Social Welfare and Development Office (CSWDO), giingon ni Gillado nga 40 ka pamilya ang naapektuhan sa sunog, nga daling gihatagan og tabang sa lokal nga panggamhanan.

Ang opisyal nagsulti nga miulbo ang sunog mga 9:39 sa buntag, nga gikan sa ikaduhang andana sa balay sa dalang Almond, SIR Matina, Phase 1 sa Barangay 76-A.

"Ang ato gitan-aw na hingudan sa sunog ang kuryente. Prior sa incident, naa sa ground floor ang tag-iya sa balay, nagluto siya, then nakadungog siya og siyagit sa silingan na naay sunog," tug-an ni Gillado.

Nakontrola ang sunog alas 10:11 sa buntag ug gideklarang pawong na alas 10:40 sa buntag.

Way natala nga angol sa insidente.

Matud sa opisyal nga ang maong sunog maoy "most significant" nga insidente karong tuiga.

Mao nga gipahimangnoan ni Gillado ang publiko nga mag-amping ug seguraduhon nga tanang electrical wires maayong pagka-instolar.

"Top one gyud na siya nga cause sa sunog sa balay. If ever magpataod ta og linya sa kuryente, i-refer gyud nato sa certified electricians para malikayan kini nga insidente," matud niya.

Tungod sa insidente, gipabahiwo sa Department of Public Works and Highways-Davao Region sa maong adlaw nga ang Bolton Bridge I ug II isira ug di paagian og sakyanan.

Dali sab dayong mipadala og tabang ang buhatan ni Davao City First District Representative Paolo Duterte ngadto sa mga nasunogan.

“[For the relocation of the victims] mag-agad ta sa desisyon sa lokal nga kagamhanan ug asa sila patukuron ug mga bagong panimalay. Andam mutabang ang congressional district office pinaagi sa Pulong-pulong ni Pulong," matud ni Duterte sa usa ka sinuwat nga pahayag.