MAS gipahugtan pa ang seguridad sa pagsulod sa Davao City Jail-Annex aron di makasulod sa prisohan ang mga kontrabado.
Sakpan sa mga awtoridad sa Davao City Jail sa Maa ang laing pagsulay og palusot sa ilegal nga druga human nasakmit sa personahe ang lima ka sachets sa gituohan nga shabu nga gipaslak sud sa mga saging gawas sa city jail.
Sa suwat pahayag gikan sa Bureau of Jail Management and Penology-Davao Region (BJMP-Davao), ang insidente nahitabo niadtong Miyerkules, Enero 12, kon diin nakita sa jail guard ang bulig sa saging nga "lakatan" nga giabandona sa taas nga bahin sa gipatong nga mga ginamit nga ligid nga nakamuntar direkta sa "searching area" sa City Jail.
Ang nasakmit nga ilegal nga druga gibanabana nga dunay street value nga P45,000 nga mitimbang og kapin kun kulang tres gramos.
Mga pulis gikan sa Talomo Police Station, mga opisyal sa Barangay Ma-a, ug pipila ka miyembro sa media daling gipahibawo bahin sa insidente alang sa saktong beripikasyon, "tagging", ug pagtunol niini aron makustodiya.
Kasamtangang naghimo pa og dugang imbestigasyon ang City Jail kon kinsa ang nagbilin sa mga saging ug kinsa ang posibleng modawat niini.
"The Bureau of Jail Management and Penology are continuously strengthening security measures in the area following the innovative ways of the perpetrators are attempting to smuggle illegal drugs and other contrabands inside our jail facilities," matud pa sa suwat pahayag sa BJMP.
Kahinumdoman nga nakapakgang na ang City Jail og pagsulay sa pagpalusot og ilegal nga druga sa miaging mga higayon.
Niadtong 11, 2021, nakasakop ang jail personnel og shabu nga kantidad og P368,000 nga gisuksok sa kalabasa.
Usa ka bulan ang milabay, nakasakmit sab ang BJMP-Davao og mga sachet sa gituohang shabu nga gilakip sa “chicken-pork adobo” nga pagkaon nga gisulayan og palusot sud sa city jail annex. Samtang nakarekober sab ang mga awtoridad og tulo ka mga sachet nga mitimbang og 25 gramos ug kantidad og P400,000 nga gikarga sa drone.