KAGAHAPON, nagtalasa usa na ka buwan nga pag-agi ni Bagyo Odette, nga nagbilin og dili maespeling nga kadaut sa tanan, nga hangtud karon duna pay mga dapit nga wala pay suga ug tubig. Akong pasalamat sa Visayan Electric ug MCWD nga hayag na ang among dapit ug nakaligo na gyud tawon.
Bisan tuod nabalik na ang kurente, apan nagpabilin nga wala gihapon mabalik ang linya sa telepono ug internet sa PLDT. Ako lang iasoy dinhi ning akong mubo nga storya. Pasensya lang sa ha. Sama tingale ninyo, ako naanad na sa kasayon sa trabaho tungod sa abag sa internet labina sa akong edad ug ning nagpadayon nga Covid-19 pandemic kay sa balay ra ko motrabaho. Apan sa paghagsa sa linya sa telcos, magkabuang sad tawon ko adto sa dapit nga dunay libre nga internet aron mapadala na akong lindog. Sige lang, dala na lang sad og suroy panagsa.
Bitaw, sa akong pangagpas duha ka punto nganong hinay ang pagpabalik sa mga telcos sa linya sa ilang mga subscriber. Una, kuwang sila og tawo nga motrabaho sa linya, di sama sa Visayan Electric nga giabagan sa pag-ayo sa mga linemen gikan sa laing dapit nga wa maigo sa bagyo. Ikaduha, ila tingale gihatagan og prayoridad ang mga dagkong establisamento ug kumpaniya sama sa hospital, malls, call centers, ug uban pa.
Sa ato pa, ang mga kabalayan nga naka subscribed sa telcos sama sa PLDT, Smart, Globe, ug Dito mahug nga uwahi mahatagan sa ilang atensyon. Alang kanako, ok ra man apan angayan hatagan sa telcos ang wala pa mabaliki sa linya og lugway sa bayronon sama diskwento o di ba di sila mokolekta bali og usa ka buwan nga bayronon. Kahibawo ta nga kining mga telcos abtik moputol sa linya og mosipyat ta og bisan usa ka adlaw. Mosugot kaha mo telcos?
***
PIT SENYOR! Bisan sa paghugot sa selebrasyon sa Pista Senyor Sto. Niño niadtong Dominggo, diin gidid-an ang katawhan nga mokuyog sa prosesyon, apan basi sa Covid-19 bulletin sa DOH niadtong Enero 15, misaka ang kaso sa takod sa Covid-19 sa probinsya, dakbayan sa Cebu, Mandaue, ug Lapu-Lapu. Tungod ba kay gilugwayan ang katawhan nga makasuroy?
Ang akong pangagpas niadtong Enero 5 sa akong lindo kon isunod ba ang dakbayan sa Sugbo sa Alert Level 3 na tinuod gyud. Nag-una nga gisaka sa Alert Level 3 niadtong unang semana ang Lapu-lapu City, unya gisunod sa Alert Level 3 ang dakbayan sa Cebu ug Mandaue sa miaging semana.
Basi sa DOH-7 Covid-19 bulletin, Enero 15, ang dakbayan sa Cebu dunay 438, nga bag-o nga kaso ug total nga 2,096. Ang dakbayan sa Mandaue, 135 ang bag-o nga kaso ug ang total 437 na, samtang ang dakbayan sa Lapu-Lapu dunay 102, nga bag-o ug 443 ang total. Ang probinsya sa Sugbo dunay 223, nga bag-o nga kaso ug ang total 1,072 na. Bisa'g dako ang kadaut sa Bagyo Odette, apan nakapugong sa pagkuyanap sa Covid kay daghan ang mga party nga wa madayon. Amping mga abay!