DAKO ang kalipay sa mga drayber sa Davao Region human gipahibalo nga migula na ug nakatakdang ipang-apud apod na ang fuel subsidy karong bulana pinaagi sa Pantawid Pasada Program Cards (PPP).
Kini subay sa paningkamot sa Land Transportation Franchising and Regulatory Board (LTFRB)-Davao Region nga makadawat ang 2,627 ka mga benepisyaryo niini.
Sumala ni LTFRB-Davao Director Nonito Llanos III nga makadawat na ang mga franchise holders sa Filcab o Multicab sa ilang fuel subsidy karong buwana.
Ang mga benepisyaryo makadawat matag usa og P7,200 isip fuel subsidy nga direkta nilang gamiton ngadto sa mga participating fuel outlets sa tibuok Davao Region. Ang listahan sa mga Filcab beneficiaries gi-post pinaagi sa LTFRB XI-Davao Region Facebook account.
Dugang ni Llanos, apil usab ang listahan sa mga nagkadaiyang mga eskedyul sa lain-laing mga Landbank branches kung diin puwede nila ma-claim pinaagi sa ilang mga PPP card aron malikayan ang paghuot sa mga bangko.
Ang maong fuel subsidy kabahin kini sa P1 bilyon nga fuel subsidies ngadto sa dul-an sa 136,000 ka mga public utility jeepney (PUJ) drivers sa tibuok nasud isip kabahin sa programa sa gobyerno sa pagtabang sa transport sector taliwala sa padayong pagsaka sa presyo sa lana.
Ang Pantawid Pasada Program unang gipatuman niadtong 2018 ug 2019 isip pagsunod sa mga probisyon sa Republic Act 10963, o ang Tax Reform for Acceleration and Inclusion (Train) Law.
Kabahin niini, dako sab ang panglantaw ni Bayaning Tsuper Partylist first nominee Atty. Alex Abaton nga mas mapalambo pa kini nga programa kung dunay mangunay aron mapapas pa ug dunay kasingkasing sa mga drayber diha sa Kongreso.
Sumala ni Abaton, "Papasada tayo at isulong ang para sa atin, para mabubuhay natin ang ating mga pamilya," ingon ni Atty. Abaton atol sa pakighinabi sa mga tigbalita sa Davao City kinsa midugang nga mohimo sila og mga lakang agi'g tubag sa mga mulo sa mga drayber. (Uban sa taho sa PIA/ETIsidro)